ملک کے مختلف علاقوں میں چھائی دھند سے پاکستان انٹرنیشنل ائیرلائن ( پی آئی اے) کا فضائی آپریشن متاثر ہوگیا۔
ترجمان پی آئی اے کے مطابق دھند سے لاہور، فیصل آباد، ملتان اور سیالکوٹ کی پروازیں متاثر ہو رہی ہیں۔ مسافروں سے درخواست ہے کہ پرواز کے لیے بکنگ کے وقت ائیرلائن کی جانب سے رابطے کے لئےدرست اور فعال نمبر کا اندراج لازمی کروائیں۔
ترجمان کا مزید کہنا تھا کہ پی آئی اے اپنے فضائی آپریشن کی حفاظت کو ناگزیر سمجھتا ہے۔ دھند کے باعث متاثر پرواز میں تاخیر کی صورت میں طیارے اور زمینی عملے سے تعاون کریں۔ پروازوں کی تاخیر پر مسافروں کی جانب سے عملے کے ساتھ عدم تعاون پرواز کی روانگی میں مزید تاخیر کا سبب بن سکتا ہے۔ مسافر اپنی پرواز سے متعلق پی آئی اے کے کال سینٹر یا ویب سائٹ سے بروقت معلومات حاصل کر سکتے ہیں۔