شام کے سابق صدر بشار الاسد کو روس میں مبینہ طور پر زہر دے کر قتل کرنے کی کوشش کا انکشاف ہوا ہے۔
غیرملکی میڈیا کے مطابق 59 سالہ سابق شامی صدر بشارالاسد نے روس کے دارالحکومت ماسکو میں طبیعت خراب ہونے پر طبی امداد طلب کی۔ بشار الاسد کو شدید کھانسی اور سانس لینے میں دشواری کا سامنا تھا۔ سابق شامی صدر کا علاج ان کے اپارٹمنٹ میں کیا گیا۔
رپورٹس کے مطابق مختلف ٹیسٹس کی رپورٹس میں بشار الاسد کو زہر دینے کی تصدیق ہوئی۔ بشارالاسد کی حالت اب بہتر بتائی جا رہی ہے۔ روس یا سابق شامی صدر کے ذرائع نے بشار الاسد کو زہر دئیے جانے کی اطلاعات سے متعلق کوئی بیان جاری نہیں کیا۔
بشار الاسد شامی دارالحکومت دمشق میں اپوزیشن گروپس کے قبضے سے قبل اپنے خاندان کے ہمراہ روس فرار ہوگئے تھے۔ روس نے انسانی ہمدردی کے بنیاد پر بشار الاسد اور ان کے خاندان کو پناہ دی ہوئی ہے۔ بشارالاسد کی اہلیہ بھی شدید بیمار ہیں اور ان کا کینسر کا علاج جاری ہے۔