مشہور نیپالی چائلڈ سنگر نوعمری میں انتقال کرگئے

نیپال کے تعلق رکھنے والا کم عمر گلوکار سچن پریار 15 سال کی عمر میں انتقال کرگئے۔

گلوکار سچن پریار نے اپنے گانے ’’اوتھا کھولرا‘‘ سے بے پناہ شہرت سمیٹی تھی۔ اسپتال ذرائع کے مطابق 15 سالہ سچن کی 2 جنوری کی صبح کھٹمنڈو کے تریبھون یونیورسٹی ٹیچنگ اسپتال میں علاج کے دوران موت ہوگئی۔

جمعرات کو جاری کردہ ایک بیان میں اسپتال نے تصدیق کی کہ سچن پریار صحت کے مختلف مسائل کےلیے پانچ سال سے زیادہ عرصے سے وہاں علاج کروا رہے تھے۔

سچن کو پیدائشی سہ رخی وینٹریکولرسسٹ کی تشخیص ہوئی تھی اور اس حالت کو سنبھالنے کےلیے ان کی نیورو سرجری ہوئی تھی۔ اس کے علاوہ وہ ذیابیطس کے بھی شکار تھے، جس کی وجہ سے انھیں روزانہ دواؤں کی ضرورت تھی۔

پریار کو 28 دسمبر کو شدید بخار، دورے اور مدہوشی کی حالت میں اسپتال داخل کیا گیا تھا۔ ان کی حالت تیزی سے خراب ہوتی گئی، جس کے نتیجے میں نمونیا، متعدد اعضاء کی خرابی، گردے کی شدید چوٹ، انسیفالوپیتھی، شدید انفیکشن اور خون بہنے کی خرابی جیسی پیچیدگیاں پیدا ہوئیں۔

پیڈیاٹرک آئی سی یو میں انتہائی نگہداشت، وینٹی لیٹر سپورٹ، اینٹی بائیوٹکس اور خون کی منتقلی کے باوجود، سچن کی صحت بگڑ گئی۔ اسپتال میں داخل ہونے کے پانچویں دن، شدید پلمونری خون بہنے کی وجہ سے آکسیجن کی کمی اور اس کے بعد دل کا دورہ پڑا۔

پریار نے کئی قابل ذکر پروجیکٹس میں اپنی آواز اور اداکاری کا ہنر دیا تھا، جس میں گانا ’’بار کو چھانلے‘‘ بھی شامل تھا، جس میں راجیش ہمل کے ساتھ گلوکارہ کملا گھمیرے، کرونا رائے، اور گووندا پاوڈل شامل تھے۔

ان کی وجہ شہرت گانا ’’اوتھا کھولرا‘‘ ہے جس کی میوزک ویڈیو میں ان کی گلوکاری اور اداکاری دونوں کی مہارتوں کو دیکھا جاسکتا ہے۔ یہ ویڈیو 2 جنوری تک یوٹیوب پر 19 ملین سے زیادہ مرتبہ دیکھی جاچکی ہے۔