غزہ میں دو دنوں کے اندر اسرائیلی فضائی حملوں سے تقریباً 140 فلسطینی شہید ہو چکے ہیں جن میں جمعہ کے روز کم از کم 61 جبکہ جمعرات کو 77 افراد شہید ہونے کی تصدیق کی گئی ہے۔
الجزیرا کی رپورٹ کے مطابق اقوام متحدہ کے انسانی حقوق کے سربراہ وولکر ترک نے کہا ہے کہ عالمی ادارے نے غزہ میں 27 صحت مراکز پر 136 اسرائیلی حملے ریکارڈ کیے ہیں جن سے بھاری جانی و مالی نقصان ہوا ہے۔
انٹرنیشنل میڈیا کے مطابق 7 اکتوبر 2023 سے جاری جنگ میں اب تک کم از کم 45,658 فلسطینی شہید اور 108,583 زخمی ہو چکے ہیں جبکہ حماس کے حملوں کے دوران اسرائیل میں کم از کم 1,139 افراد ہلاک اور 200 سے زائد کو یرغمال بنا لیا گیا تھا۔
غیر ملکی میڈیا کے مطابق دوسری جانب قطر میں مذاکرات کے دوبارہ شروع ہونے پر حماس کے سینیئر اہلکار باسم نعیم نے کہا کہ فلسطینی گروپ جنگ بندی کے معاہدے، غزہ سے اسرائیلی افواج کے انخلاء اور انکلیو کی آبادی کو ان کے گھروں کو واپس کرنے کے لیے سنجیدہ ہے۔