ہیٹر کے استعمال میں کن احتیاطی تدابیر کا خیال ضروری ہے؟

ریسکیو 1122 نے عوام کو گیس سے متعلقہ آلات کے استعمال میں احتیاط کا مشورہ دیا ہے۔

ریسکیو 1122 کی ایڈوازئری میں کہا گیا ہے کہ سردیوں میں گیس اور الیکٹرک ہیٹر کا استعمال زیادہ ہونے کی وجہ سے آگ لگنے کے واقعات بڑھ جاتے ہیں جس میں زیادہ تر حادثات گیس لیکج کے باعث پیش آتے ہیں۔ 

شہری رات کو سونے سے پہلے گیس ہیٹر، چولہے وغیرہ لازمی بند کریں اور گھر میں گیس لیکج محسوس ہونے پر بجلی کا بٹن اور آگ ہرگز نہ جلائیں، گیس لیکج کی صورت میں بجلی کا بٹن یا آگ جلانے سے دھماکہ ہو سکتا ہے۔

ایڈوائزری میں مزید کہا گیا ہے کہ گھر میں گیس لیکج محسوس ہونے پر تمام دروازے اور کھڑکیاں کھول دیں اور تمام افراد گھر سے باہر چلے جائیں۔

واضح رہے کہ سردیوں اور عام طور پر کمرے کو گرم کرنے کے لیے گیس سے چلنے والے ہیٹر یا گیزر استعمال کیے جاتے ہیں۔

بعض اوقات رات کے دوران لوڈ شیڈنگ یا کسی بھی وجہ سے گیس کی ترسیل بند ہو جاتی ہے اور ہیٹر بجھ جاتا ہے۔

گیس کی ترسیل بحال ہونے پر آگ نہیں جلتی لیکن گیس کا اخراج جاری رہتا ہے جو حادثے کی وجہ بنتا ہے۔

بجلی سے چلنے والے ہیٹر بھی رات کو بھی سونے سے پہلے لازماً بند کیا جانا چاہئے کیونکہ بجلی کی تار زیادہ گرم ہونے پر آگ پکڑ سکتی ہیں جو حادثے کا باعث بن سکتی ہے۔