سری لنکن بولر کی نیوزی لینڈ کیخلاف ون ڈے میں ہیٹ ٹرک
مہیش تھیکشانا ون ڈے میں ہیٹ ٹرک کرنے والے سری لنکا کے 10ویں بولر ہیں
ہملٹن:
سری لنکا کے دائیں ہاتھ کے اسپنر مہیش تھیکشانا نے نیوزی لینڈ کے خلاف ون ڈے میں اپنی پہلی ہیٹ ٹرک کر لی۔
ہملٹن میں کھیلے گئے دوسرے ون ڈے میں مہیش تھیکشانا نے نیوزی لینڈ کے مچل سینٹنر، نیتھن اسمتھ اور میٹ ہینری کو آؤٹ کرکے یہ اعزاز اپنے نام کیا۔ میزبان ٹیم کے تینوں کھلاڑی کیچ آؤٹ ہوئے۔
مہیش تھیکشانا ون ڈے میں ہیٹ ٹرک کرنے والے سری لنکا کے 10ویں بولر ہیں۔
سری لنکا کے سابق فاسٹ بولر لاستھ ملینگا ون ڈے میں تین بار ہیٹ ٹرک کرنے کا اعزاز رکھتے ہیں۔
پاکستان کے سابق بولر جلال الدین نے ون ڈے کرکٹ میں سب سے پہلے ہیٹ ٹرک کرنے کا اعزاز اپنے نام کیا تھا۔ انہوں نے 1982 میں آسٹریلیا کے خلاف یہ کارنامہ سرانجام دیا تھا۔