نماز کی بے حرمتی پر رجب بٹ کو گرفتاری کا خوف؛ عدالت سے رجوع کرلیا

معروف ٹک ٹاکر رجب بٹ کے خلاف مقدمہ درج ہونے پر ان کی حفاظتی ضمانت لاہور میں دائر کی گئی ہے۔

ٹک ٹاکر کے خلاف کراچی میں نماز کی بے حرمتی کا مقدمہ درج کیا گیا ہے تاہم رجب نے پولیس کی گرفتاری سے بچنے کےلیے لاہور ہائیکورٹ میں حفاظتی ضمانت دائر کی ہے۔

درخواست میں موقف اختیار کیا گیا ہے کہ خدشہ ہے رجب بٹ کو کراچی میں داخلے پر گرفتار کرلیا جائے گا، اس لیے حفاظتی ضمانت منظور کرلی جائے۔

رجب بٹ اپنے وکلا کے ہمراہ لاہور عدالت میں پیش ہوئے اور مؤقف اختیار کیا کہ وہ کیس کی پیروی کےلیے کراچی کی متعلقہ عدالت میں پیش ہونا چاہتے ہیں لیکن خدشہ ہے کہ عدالت میں پیش ہونے سے پہلے پولیس انہیں گرفتار کرلے گی۔

لاہور ہائیکورٹ کے جسٹس فاروق حیدر نے حفاظتی ضمانت پر سماعت کرتے ہوئے سات روز کی حفاظتی ضمانت منظور کرلی ہے۔

یاد رہے کہ ٹک ٹاکر کے خلاف بیہودہ اور فحش حرکات کی ویڈیوز اپلوڈ کرنے پر ملتان کی عدالت میں بھی سماعت کی گئی تھی۔