ویرات کوہلی کا فوجی کیساتھ سیلفی سے انکار، بھارتی سوشل میڈیا پر طوفان کھڑا

بھارتی بلے باز ویرات کوہلی مبینہ طور پر سیلفی کے لیے انتظار کرتے بھارتی فوجی اہلکار کو نظر انداز کرنے کی ویڈیو وائرل ہونے کے بعد کڑی تنقید کے زد میں آگئے۔

سماجی رابطے کے پلیٹ فارم ایکس پر وائرل ہونے والی ویڈیو کے مطابق ممبئی میں گاڑی سے اتر کر جب ویرات کوہلی جارہے تھے تو ایک فوجی اہلکار فون لے کر بلے باز کے پاس آیا جس کو انہوں نے نظر انداز کر دیا۔

ویڈیو وائرل ہونے کے بعد سوشل میڈیا صارفین نے ویرات پر جان بوجھ کر فوجی کے ساتھ سیلفی سے لینے سے انکار کرنے کا الزام عائد کرتے ہوئے ان کے رویے پر شدید تنقید کی۔

ایک ایکس صارف کا کہنا تھا کہ سچن ٹینڈولکر کے 24 سالہ کیریئر میں کبھی ان کو ایسا کرتے نہیں دیکھا۔ نہ ہی ڈراوڈ، لکشمن یا گنگولی کو۔

ایک او ر صارف نے کہا کہ ایسے کرکٹر یا کھلاڑی ان کے رول ماڈل نہیں ہوسکتے۔

واضح رہے رپورٹس کے مطابق ویرات کوہلی اور ان کی اہلیہ حال ہی میں علی باغ میں قائم اپنے وِلا میں شفٹ ہوئے ہیں۔

اس ہی دوران دونوں کو گیٹ وے آف انڈیا پر علی باغ کے لیے جاتی فیری پر بھی سوار دیکھا گیا تھا۔ مداحوں میں یہ قیاس آرئیاں چل رہی ہیں کہ ویرات اور انوشکا مستقل طور پر اپنے علی باغ کے گھر میں منتقل ہوچکے ہیں۔