بالی ووڈ اداکار سلمان خان کے رشتے دار کراچی میں مقیم، رابطے آج بھی برقرار

بالی ووڈ کے سپر اسٹار دبنگ خان کے عزیز کراچی کے علاقے خداداد کالونی میں آج بھی رہائش پذیر ہیں جن کے گھر پر بالی ووڈ گھرانہ تشریف لاچکا ہے۔

اس گھر کے سربراہ باری ہیں جن کا سلمان خان کے والد سلیم خان سے پھوپھی زاد بھائی کا رشتہ ہے۔

انہوں نے بتایا کہ ہمارا آبائی تعلق بھارت کے شہر اندور سے ہے اور پاکستان بننے کے بعد ہم نے وہاں سے کراچی ہجرت کی، ممبئی کے بعد دوسرا بی ٹاؤن شہر اندور ہے۔

انٹرویو کے دوران اس بات کا انکشاف بھی ہوا کہ سلمان خان، ارباز خان اور بہن کی گاڑی کو حادثہ بھی پیش آیا تھا۔

ایکسپریس کو دیے گئے انٹرویو میں سلمان خان کے رشتے دار کی جانب سے دلچسپ انکشافات سامنے آئے اور انہوں نے دعویٰ کیا کہ سلمان خان، ارباز اور بہن کراچی آچکے ہیں اور وہ تین ماہ تک یہی پر مقیم تھے، جس کے دوران انہوں نے لائٹ ہاؤس سے جینز کی پینٹیں بھی خریدیں۔

سلیم خان کے پھوپھی زاد بھائی باری جیلانی نے انکشاف کیا کہ جانی واکر ہمارا رشتہ دار تھا جبکہ اندور میں دلیپ کمار سمیت بہت سارے اداکاروں کے ساتھ نہ صرف ملاقاتیں ہوئیں بلکہ پُرتکلف عشایے بھی ہوئے۔

باری جیلانی کے مطابق اُن کے پھوپھو سلمان خان کے پر دادا یعنی سلیم خان کے دادا تھے وہ پولیس میں ڈی آئی جی تھے، اسی وجہ سے پاکستان نہیں آئے۔

انہوں نے بھول جانے کے سوال کا جواب دیتے ہوئے کہا کہ ’ابھی ایک گھنٹے پہلے ہماری بات ہوئی ہے، سلیم کی بہن ثریا تھی اُن کا بیٹا جو فلموں کیلیے گانے گاتا ہے وہ رابطے میں ہے‘۔

سلمان خان، ارباز اور سہیل خان کی کراچی آمد

باری جیلانی کے بیٹے ندیم نے بتایا کہ سلمان خان، ارباز، سہیل خان اور بہن 1980 کے آخر میں کراچی آئے اور پھر یہاں ہمارے گھر پر تین ماہ قیام کیا تھا۔

سلمان خان کے تین ماہ خداد کالونی میں رہائش کی وجہ؟

ندیم جیلانی کے مطابق ہمارے ایک دوست ناصر عبداللہ کے پاس ٹریل بائیک تھی، جس کو چلانے کیلیے ارباز نے خواہش ظاہر کی اور جیسے ہی اس کو چلایا تو موٹرسائیکل کنٹرول سے باہر ہوگئی اور پھر وہ گر گئے تھے اور ٹانگ میں فریکچر ہوگیا تھا پھر وہ تین ماہ اسی گھر میں مقیم رہے۔

سائیکل چلانے میں مہارت

انہوں نے بتایا کہ ’سلمان خان اُس وقت اداکار نہیں تھے بلکہ وہ ماڈل تھے، وہ سائیکل چلانے کے ماہر تھے اور ایک ٹائر پر بہت دور تک چلاتے تھے جبکہ وہ بس سے ریس لگاتا تھا‘۔