کراچی:
بلوچستان کی سرد ہوائیں شہرپراثراندازہونا شروع ہوگئیں اور جمعے کو پارہ گزشتہ روزکے مقابلے میں 3.6ڈگری کم ریکارڈ ہوا اور معمول سے قدرے تیزہوائیں چلنے کے سبب دن بھرسردی محسوس کی گئی جبکہ محکمہ موسمیات کی پیش گوئی ہے کہ ہفتے کو پارہ سنگل ڈیجیٹ میں ریکارڈ ہوسکتا ہے۔
محکمہ موسمیات کے مطابق بلوچستان میں گزشتہ دنوں داخل ہونے اوربارشوں کا سبب بننے والے مغربی سسٹم کے اثرات کے نتیجے میں جمعے کوشہر کا موسم یکسرتبدیل ہوا اور محکمہ موسمیات نے 24 جنوری سے شہرمیں سردی کی نئی لہر کی پیش گوئی بھی کی تھی۔
محکمہ موسمیات نے بتایا کہ صبح کے وقت سردی محسوس کی گئی، جس کے دوران شہر کا کم سے کم پارہ گزشتہ روزکے مقابلے میں 3.6 ڈگری کمی سے 10.9 ڈگری سینٹی گریڈ ریکارڈ ہوا اور جمعے کومعمول سے قدرے تیزہوائیں چلیں، جس کی رفتار25.2 کلومیٹر فی گھنٹہ (14ناٹیکل میل) ریکارڈ ہوئی۔
ارلی وارننگ سینٹر کے مطابق ہفتہ اور اتوار کو شہر کا پارہ سنگل ڈیجیٹ میں 9 ڈگری تک گرسکتا ہے، آئندہ چند روزکے دوران شمال مشرقی سمت کی ہوائیں چلنے کے سبب موسم سرد اورخشک رہنے کا امکان ہے۔