ایوی ایشن سیفٹی کے معیار کا جائزہ لینے کے لیے برطانیہ کا وفد پاکستان پہنچ گیا۔
برطانیہ کے محکمہ ٹرانسپورٹ اور سول ایوی ایشن اتھارٹی کا وفد پاکستان سول ایوی ایشن اتھارٹی( پی سی اے اے) کے سیفٹی معیار کا جائزہ لینے کے لیے پاکستان پہنچا ہے۔ یہ تشخیص پاکستانی کیرئیرز کی جانب سے پاکستان اور برطانیہ کے درمیان فلائٹ آپریشن دوبارہ شروع کرنے کی جانب اگلا قدم ہے۔ دورہ کرنے والے وفد کی میزبانی پی سی اے اے کے ڈائریکٹر جنرل نادر شفیع ڈار اور ان کی ٹیم کے ماہرین نے کی۔
دونوں فریقین کے درمیان کئی اعلیٰ سطح ملاقاتیں ہوں گی جن میں ہوا بازی کے حفاظتی پروٹوکول، دستاویزات کا جائزہ لینے اور آپریشنل طریقہ کار کا جائزہ لیا جائے گا۔ بین الاقوامی معیار کا جائزہ لینے کے لیے برطانوی وفد ائیر لائنز کا بھی دورہ کرے گا۔ گزشتہ کئی ماہ کے دوران سی اے اے حکام برطانیہ کے ساتھ سلسلہ وار تکنیکی ملاقاتوں میں مصروف رہے ہیں۔
سی اے اے حکام کا کہنا ہے کہ برطانوی وفد کے دورے کے مثبت نتائج کے بارے میں پرامید ہیں۔