پشپا 2 – نیٹ فلکس پر اضافی فوٹیج کے ساتھ ریلیز ہونے کو تیار

الو ارجن کی بلاک بسٹر فلم پشپا 2 – دی رول کو سینما گھروں میں زبردست کامیابی ملی، اور اب شائقین کے لیے خوشخبری ہے کہ یہ فلم جلد ہی نیٹ فلکس پر ریلیز ہونے والی ہے۔ 

فلم کا نیا ورژن "پشپا 2 – ری لوڈڈ" اضافی 23 منٹ کی فوٹیج کے ساتھ ڈیجیٹل پلیٹ فارم پر دستیاب ہوگا۔

نیٹ فلکس نے اپنے سوشل میڈیا اکاؤنٹ پر پوسٹر شیئر کرتے ہوئے کہا، "دی مین، دی مِتھ، دی برانڈ پشپا کی حکمرانی شروع ہونے والی ہے! دیکھیں پشپا 2 – ری لوڈڈ ورژن نیٹ فلکس پر جلد، تلگو، تمل، ملیالم اور کناڈا زبان میں!"

نیٹ فلکس کے "نیو اینڈ ہاٹ" سیکشن میں فلم کا پوسٹر شائع کیا گیا ہے، جس کے مطابق فلم 30 جنوری کو پلیٹ فارم پر پریمیئر ہوگی۔ تاہم، ہندی ورژن کے لیے شائقین کو مزید انتظار کرنا پڑے گا، کیونکہ یہ ورژن فی الحال ریلیز نہیں کیا جائے گا۔

فلم کی کہانی پشپراج (الو ارجن) کے گرد گھومتی ہے، جو ایک چھوٹے سے چندن اسمگلر سے خوفناک گینگسٹر بن جاتا ہے۔ فلم میں فہد فاضل مرکزی ولن کے کردار میں ہیں، جبکہ راشمیکا مندنا پشپراج کی بیوی شری ولی کا کردار ادا کر رہی ہیں۔ 

فلم میں انتقام کی کہانی کو بہترین انداز میں پیش کیا گیا ہے، جہاں پولیس افسر ایس پی بھنور سنگھ شیکاوت پشپراج کے گینگ کو تباہ کرنے کے مشن پر ہیں۔