برطانیہ میں ملازمین کی ذہنی تھکاوٹ کو دور کرنے اور تازہ دم ہوکر دفتر آنے کا موقع دینے کے لیے بڑا فیصلہ کیا گیا ہے۔
عالمی خبر رساں ادارے کے مطابق برطانیہ کی 2 سو کمپنیوں نے مستقل طور پر ہفتے میں 4 روز کام اور 3 دن کی چھٹی پر آمادگی ظاہر کردی۔
خیال رہے کہ یہ اقدام برطانیہ کی 4 ڈے ویک فاؤنڈیشن کی ملک گیر آگاہی مہم سے متاثر ہوکر اُٹھایا گیا ہے۔
جن 200 کمپنیوں نے ہفتے میں 4 روزہ کام کی حمایت کی ہے اس میں 5 ہزار سے زائد ملازمین کام کرتے ہیں۔
4 ڈے ویک فاؤنڈیشن کے ڈائریکٹر کا کہنا ہے کہ ہفتے میں 5 دن صبح 9 سے شام 5 تک کام کا طریقہ کار 100 سال قبل بنایا گیا تھا۔
انھوں نے مزید کہا کہ اب یہ موجودہ وقت کے لیے موزوں نہیں رہا اور اسے تبدیل کرکے ہفتے میں 4 روز کام اور 3 چھٹیاں کی جائیں۔
یاد رہے کہ 2 سال قبل بیلجیئم نے ہفتے میں 4 دن کام کے لیے قانون سازی کی تھی جس سے یہ پہلا یورپی ملک بن گیا ہے۔