لاہور: امیر بالاج قتل کیس میں مطلوب تیسرا ملزم بھی گرفتار

پولیس نے امیر بالاج قتل کیس میں مطلوب تیسرے ملزم کو گرفتار کر لیا۔

اشتہاری ملزم بلاول کو عمان سے گرفتار کیا گیا اور لاہور ایئرپورٹ منتقل کر دیا گیا، پولیس کے مطابق انٹرپول نے ملزم کی گرفتاری کے لیے ریڈ نوٹس جاری کیا تھا۔

گرفتار ملزم پنجاب پولیس کو مطلوب تھا اور اس کے خلاف تھانہ چوہنگ، لاہور میں مقدمہ درج تھا، ملزم گزشتہ سال بیرون ملک فرار ہو گیا تھا تاہم پولیس کی مسلسل کوششوں کے بعد اسے عمان سے گرفتار کر کے پاکستان منتقل کر دیا گیا۔

دریں اثنا پولیس نے بیرون ملک سے گرفتار ملزم بلاول کا پانچ روز جسمانی ریمانڈ حاصل کرلیا۔

ایس پی آرگنائزڈ کرائم آفتاب پھلروان کے مطابق ملزم کو ریڈ نوٹس جاری کرواکر بیرون ملک سے گرفتار کرکے پاکستان  لایا گیا۔ ملزم بلاول اور دیگر کے خلاف امیر بالاج کے قتل کا مقدمہ تھانہ چوہنگ میں درج ہے۔

یاد رہے کہ امیر بالاج ٹیپو کو لاہور کے علاقے چوہنگ میں 18 فروری 2024 کو ایک شادی کی تقریب میں فائرنگ کر کے قتل کر دیا گیا تھا، جس کا الزام ان کے مخالف گینگ کے سربراہ طیفی بٹ اور ان کے بھائی گوگی بٹ پر تھا۔