روحانی دوست

واٹس اپ (03338818706)
فیس بک (Saim Almustafa Saim)

علمِ الاعداد سے نمبر معلوم کرنے کا طریقہ:
دو طریقے ہیں اور دونوں طریقوں کے نمبر اہم ہیں۔ اول تاریخ پیدائش دوم نام سے!
اول طریقہ تاریخ پیدائش:
مثلاً احسن کی تاریخ پیدائش 12۔7۔1990 ہے۔ ان تمام اعداد کو مفرد کیجیے، یعنی باہم جمع کیجیے:
1+2+7+1+9+9=29، 29 کو بھی باہم جمع کریں (2+9) تو جواب 11 آئے گا۔
11 کو مزید باہم جمع کریں (1+1) تو جواب 2 آیا یعنی اس وقت تک اعداد کو باہم جمع کرنا ہے جب تک حاصل شدہ عدد مفرد نہ نکل آئے۔ پس یعنی آپ کا لائف پاتھ عدد/نمبر ہے۔ 
گویا تاریخ پیدائش سے احسن کا نمبر 2 نکلا۔
اور طریقہ دوم میں:
سائل، سائل کی والدہ، اور سائل کے والدین کے ناموں کے اعداد کو مفرد کیجیے، مثلاً نام ’’احسن‘‘ والدہ کا نام ’’ شمسہ‘‘ والد کا نام ’’ راشد۔‘‘
حروفِ ابجد کے نمبرز کی ترتیب یوں ہے:
1 کے حروف (ا،ء ،ی،ق،غ)
2 کے حروف (ب،ک،ر)
 3 کے حروف (ج،ل،ش)
4 کے حروف (د،م،ت) 
 5 کے حروف (ہ،ن،ث) 
6 کے حروف (و،س،خ)
7 کے حروف (ز،ع،ذ) 
8 کے حروف (ح،ف،ض) 
9 کے حروف (ط،ص،ظ)
احسن کے نمبر (1،8،6،5)
 تمام نمبروں کو مفرد کردیں:
(1+8+6+5=20=2+0= 2 
گویا احسن کا نمبر2 ہے۔
ایسے ہی احسن کی والدہ ’’شمسہ‘‘ کا نمبر9 اور والد راشد کا نمبر1 بنتا ہے۔
اب ان تینوں نمبروں کا مفرد کرنے پر ہمیں احسن کا ایکٹیو یا لائف پاتھ نمبر مل جائے گا:
(2+9+1=12=1+2=3)
 گویا علم جفر کے حساب سے احسن کے نام کا نمبر 3 نکلا!

علم الاعداد کی روشنی میں آپ کا یہ ہفتہ 
پیر3تا 9 فروری 2025

پیر3فروری 2025
آج کا حاکم عدد7 ہے۔
7 کا عدد ایسی سوچوں کو حاوی کرسکتا ہے جو مادی چیزوں کی وقعت کو کم کردیں۔ ہوسکتا ہے کچھ رشتوں اور چیزوں سے آپ لاتعلق ہونا بہتر سمجھیں۔ مراقبہ، سیاحت اور خودشناسی جیسے امور متحرک ہوسکتے ہیں۔ اپنی تلاش میں اپنی ذات کے اندر سفر کا موقع مل سکتا ہے۔
آپ کی تاریخ پیدائش میں اگر 3،4،5،7،8 اور9 خصوصاً 8کا عدد یا پیدائش کا دن ہفتہ ہے یا نام کا پہلا حرف ح،ف یا ض ہے تو آج کا دن آپ کے لیے بہتر دن ہوسکتا ہے۔ 
لیکن اگر آپ کی تاریخ پیدائش میں 1،2 یا 6 خصوصاً 6کا عدد یا پیدائش کا دن جمعہ ہے یا نام کا پہلا حرف و،س یا خ ہے تو آپ کے لئے اہم اور کچھ مشکل بھی ہوسکتا ہے۔
آج کا صدقہ: کسی کی غلطی معاف کرنا بھی صدقہ ہے۔ 20 یا 200 روپے، سفید رنگ کی چیزیں، کپڑا، دودھ، دہی، چینی یا سوجی کسی بیوہ یا غریب خاتون کو بطورِصدقہ دینا ایک بہتر عمل ہوگا۔
آج کا وردِخاص،’’یارحیم، یارحمٰن، یااللّہ‘‘ 11 بار، اول وآخر ایک بار درودشریف پڑھنا بہتر ہوگا۔ اسے کم از کم 11 بار لکھیں پھر اثرات ملاحظہ کیجیے!

منگل 4 فروری 2025
آج کا حاکم عدد 6 ہے۔
 6 اور منگل کا امتزاج ایسے ہی ہے جیسے خوب صورت اور پرکشش دکھائی دینے والا سانپ جو قریب ہوتے ہی گلے میں موت بن کے لپٹ جاتا ہے، جس کے کاٹنے سے وجود میں دوڑنے والا اپنا ہی لہو زہر قاتل بن جاتا ہے۔ ایسے ہی کچھ رشتے ہمارے آس پاس ہیں اُن سے محتاط رہیں۔
اگر آپ کی تاریخ پیدائش میں 1،4،5،6،8 یا 9 خصوصاً 9 کا عدد ہے یا آپ کی پیدائش کا دن منگل ہے یا نام کا پہلا حرف ص،ط یا ظ ہے تو آپ کے لیے آج کا دن کافی حد تک بہتری لائے گا۔
لیکن اگر آپ کی تاریخ پیدائش میں 2،3 یا 7 خصوصاً 2 یا پیدائش کا دن پیر ہے یا نام کا پہلا حرف ب،ک یا ر ہے تو آپ کے لیے کچھ مشکل ہوسکتی ہے۔
آج کا صدقہ: صبروتحمل کو مضبوطی سے تھامیں، آپ کی آزمائش کا دن ہے غصہ پی جائیں، یہ بہترین صدقہ اور تدبیر ہے۔ 90 یا 900 روپے، سرخ رنگ کی چیزیں ٹماٹر، کپڑا، گوشت یا سبزی کسی معذور سیکیوریٹی سے منسلک فرد یا اس کی فیملی کو دینا بہتر عمل ہوگا۔
آج کا وردِخاص،’’یاغفار، یاستار، استغفراللّہ العظیم‘‘ 13 بار اول وآخر1 بار درودشریف پڑھنا بہتر ہوگا۔ اسے 13 بار لکھنے سے نتائج سوفی صد آپ کے حق میں ہوں گے۔

بدھ 5 فروری 2025
آج کا حاکم عدد 3 ہے۔
بدھ کے دن 3 اور 5 اعداد کا متحرک ہوگا، بہترین دن ہے۔ ملاقات، مذاکرات یا گفتگو معنی خیز اور نتیجہ لانے والی ہوسکتی ہے۔ ایسا سفر جو فائدہ مند ہو ہوسکتا ہے۔ اگر آپ سفر کے لیے کوشاں ہیں تو امیدِکامل ہے کہ آج مثبت نتیجہ حاصل ہوسکتا ہے۔ غوروفکر اور مطالعہ عقل کے نئے خزانے دے سکتا ہے۔
2،3،4،7،8 اور9خصوصاً 3 کا عدد یا پیدائش کا دن جمعرات ہے یا نام کا پہلا حرف ج،ل یا ش ہے تو آپ کے لیے آج دن کافی بہتر ہوسکتا ہے۔
لیکن اگر آپ کی تاریخ پیدائش میں 1،6 یا 5 خصوصاً 1 یا پیدائش کا دن اتوار یا نام کا پہلا حرف ا،ی یا غ ہے تو کچھ معاملات میں رکاوٹ اور پریشانی کا اندیشہ ہے۔
آج کا صدقہ: ہوسکتا ہے کوئی آپ سے اپنی غلطی پر معذرت خواہ ہو، ایسا ہو تو درگزر سے کام لینا بھی صدقہ ہے۔ زرد رنگ کی چیزیں یا 50 یا 500 روپے کسی مستحق طالب علم یا تیسری جنس کو دینا بہتر ہے، تایا، چچا، پھوپھی کی خدمت بھی صدقہ ہے۔
آج کا وردِخاص،’’یاخبیرُ، یاوکیلُ، یااللّہ‘‘ 5 بار اول و آخر 1 بار درودشریف پڑھنا مناسب عمل ہوگا۔ ان اسمائے الٰہیہ کو 5 بار لکھنا آپ کے لیے سعادتوں کے دروازے سو فی صد کھول دے گا۔

جمعرات 6فروری 2025
آج کا حاکم عدد 2 ہے۔
بہن اور والدہ مذہبی سفر کر سکتی ہیں۔ عمرہ، زیارات یا کسی بزرگ کی سمت سفر یا کسی مذہبی محفل میں شریکِ ہونے کا موقع بھی مل سکتا ہے۔ گھر اور والدہ کی کوئی فکر یا ذمے داری سر پر آسکتی ہے۔ اپنے معدے کا خیال رکھیں اور جذباتی ہونے سے گریز کریں۔
اگر آپ کی تاریخ پیدائش میں 1،3،4،5،8 یا 9 خصوصاً 4 کا عدد یا پیدائش کا دن اتوار ہے یا نام کا پہلا حرف د،ت یا م ہے تو آپ کے لیے بہتر دن ہے۔
لیکن اگر آپ کی تاریخ پیدائش میں 2،6 یا 7 خصوصاً 6 کا عدد یا پیدائش کا دن جمعہ ہے یا نام کا پہلا حرف و،س یا خ ہے تو اندیشہ ہے کہ کچھ امور میں آپ کو مشکل ہوسکتی ہے۔
آج کا صدقہ: میٹھی چیز، 30 یا 300 روپے کسی مستحق نیک شخص کو دینا بہتر عمل ہوسکتا ہے۔ مسجد کے پیش امام کی خدمت بھی احسن صدقہ ہے۔
آج کا وردِخاص، سورۂ فاتحہ کی تین بار تلاوت یا ’’یاقدوس، یاوھابُ، یااللّہ‘‘ 3 بار اول و آخر 1 بار درودشریف پڑھنا بہتر عمل ہوگا۔ اللّہ کے ان پاک ناموں کو تین بار لکھیں۔

جمعہ 7فروری 2025
آج کا حاکم عدد 6 ہے۔
 6کا عدد جمعہ کا ذاتی عدد ہے۔ 6 زہرہ سے تعلق رکھتا ہے جو خوشی، راحت اور ذہنی و روحانی سکون کا سبب بنتا ہے۔ نیا لباس یا خوشبو یا کوئی ایسی شے جو آپ کی سہولت میں اضافہ کرے حاصل ہوسکتی ہے۔ ایک خوب صورت دن جو پسندیدہ شخص سے ملاقات بھی کراسکتا ہے۔
اگر آپ کی تاریخ پیدائش میں 1،4،5،6،8 یا 9 خصوصاً 9 کا عدد یا پیدائش کا دن منگل ہے یا نام کا پہلا حرف ص،ط یا ظ ہے تو آپ کے لیے بہتری کی امید ہے۔
لیکن اگر آپ کی تاریخ پیدائش 2،3 یا 7 کا عدد خصوصاً 7 یا پیدائشی دن پیر یا جن کے نام کا پہلا حرف ع،ز یا ذ ہے تو آپ کو محتاط رہنے کا مشورہ ہے۔
آج کا صدقہ: کسی سے میٹھے بول اور نرم لہجہ بھی صدقہ ہے۔ 60 یا 600 روپے یا 600 گرام یا 6 کلو چینی، سوجی یا کوئی جنس کسی بیوہ کو دینا بہترین عمل ہوسکتا ہے۔
آج کا وردِخاص، سورۂ کہف ایک بار اور ’’یاودود، یامعید، یااللّہ‘‘ 11 بار ورد کرنا بہتر ہوگا اول و آخر ایک بار درودشریف لازم پڑھ لیں۔ ان اسمائے الٰہی کو تین بار لکھیں۔

ہفتہ 8فروری 2025
آج کا حاکم عدد 9 ہے۔
 8 اور9 کا امتزاج خرابی کی خبر دیتا ہے۔ ممکن ہے صبر کرنا مشکل ہو، غصہ دماغ کی رگوں میں انگارے بھردے، یہ ایک امتحان ہوسکتا ہے۔ حادثے کی کئی صورتیں ہیں صدمہ، رنج، کسی کے رویے سے اذیت یا سفر میں حادثہ ہوسکتا ہے۔ صدقہ ضرور دیں اور انتہائی محتاط رہیں۔
اگر آپ کی تاریخ پیدائش میں 1،2،3،5،6 اور7 خصوصاً 6 کا عدد یا پیدائشی دن جمعہ یا نام کا پہلا حرف و،س یا خ ہے تو آپ کے لیے ایک اچھا دن ہوسکتا ہے۔
لیکن اگر آپ کی تاریخ پیدائش میں 4،8 یا 9 خصوصاً 4 کا عدد یا پیدائشی دن اتوار یا نام کا پہلا حرف د،م یا ت ہے تو آپ کو محتاط رہنے کا مشورہ ہے۔
آج کا صدقہ: صبر اور خاموشی بہترین تدبیر ہے لمبے عرصے کی منصوبہ بندی کے لیے سازگار وقت ہے
 80 یا800 روپے یا کالے رنگ کی چیزیں کالے چنے، کالے رنگ کے کپڑے سرسوں کے تیل کے پراٹھے کسی معذور یا عمررسیدہ مستحق فرد کو دینا بہتر عمل ہوسکتا ہے۔
آج کا وردِخاص، کمی رزق کی ہو، سکون کی ہو یا راحتوں کی ہو اس وردخاص کو اپنالیں ان شاء اللّہ بند دروزاے کھل جائیں گے،’’یافتاح، یاوھابُ، یارزاق، یااللّہ‘‘ 8 بار اول و آخر 1 بار درودشریف کا ورد بہتر عمل ہوگا۔ تین بار لکھنا اس کے فوائد کو کئی گنا بڑھادے گا۔

اتوار 9 فروری 2025
آج کا حاکم عدد 3 ہے۔
ایسے تمام افراد جو کسی بھی جگہ انتظامی ذمے داریاں نبھاتے ہیں ان کی ترقی کی کوئی نہ کوئی صورت نکل سکتی ہے یا اپنے امور میں کام کو بہتر کرنے کا موقع اور سہولت مل سکتی ہے۔ 3 کا عدد خالصتاً ترقی اور روحانیت کی توانائی دیتا ہے۔ حکم راں طبقے کے لیے بہتر دن ہے۔
اگر آپ کی تاریخ پیدائش میں 2،3،4،7،8 یا 9خصوصاً 3 کا عدد یا جن کا پیدائشی دن جمعرات ہے یا نام کا پہلا ج،ل یا ش ہے تو آپ کے لیے ایک اچھے دن کی امید ہے۔
لیکن اگر آپ کی تاریخ پیدائش میں 1،5 یا 6 خصوصاً 5 عدد یا جن کا پیدائشی دن بدھ ہے یا نام کا پہلا حرف ہ،ن یا ث ہے تو آپ کے لیے کچھ مشکل ہوسکتی ہے۔
آج کا صدقہ: 13یا 100 روپے یا سنہری رنگ کی چیزیں گندم، پھل، کپڑے، کتابیں یا کسی باپ کی عمر کے فرد کی خدمت کرنا بہتر ہوگا
آج کا وردِخاص،’’یاحی، یاقیوم، یااللّہ‘‘ 13 اول و آخر 1بار درودشریف پڑھنا مناسب عمل ہوگا، اسے 13 بار لکھنا بہتر ہوگا۔