پاکستان نے کامن ویلتھ گیمز میں پہلا چاندی کا تمغہ حاصل کرلیا

جوڈو کے100 کلوگرام کیٹیگری کے سیمی فائنل میں شاہ حسین شاہ نے نیوزی لینڈ کے ٹم سلائفیلڈ کو شکست دے کر فائنل میں رسائی حاصل کی تھی۔ فوٹو: رائٹرز

---

کامن ویلتھ گیمز کے جوڈو کے فائنل مقابلے میں پاکستانی کھلاڑی شاہ حسین شاہ نے پہلا چاندی کا تمغہ حاصل کرلیا۔

گلاسکو میں جاری کامن ویلتھ گیمز میں جوڈو مقابلے کی 100 کلو گرام کیٹیگری کے فائنل میں پاکستان کے شاہ حسین شاہ کا مقابلہ اسکاٹ لینڈ کے کرسٹوفر شیرینٹن سے ہوا جس میں اسکاٹ لینڈ کے کھلاڑی نے شاہ حسین شاہ کو ہرا کر طلائی کا تمغہ حاصل کرلیا جبکہ پاکستانی کھلاڑی چاندی کا تمغہ جیتنے میں کامیاب رہے۔

اس سے قبل سیمی فائنل مقابلے میں شاہ حسین شاہ نے نیوزی لینڈ سے تعلق رکھنے والے حریف ٹم سلائفیلڈ کو شکست دے کر فائنل میں رسائی حاصل کی تھی۔

واضح رہے کہ کامن ویلتھ گیمز میں پاکستان کئی مقابلوں میں حصہ لے رہا ہے لیکن اب تک کسی بھی کھیل میں قومی کھلاڑی اچھی کارکردگی کا مظاہرہ نہیں کرپائے تاہم اب شاہ حسین شاہ کی صورت میں پاکستان نے پہلا تمغہ جیت لیا ہے۔