جہلم؛ بھائیوں کی فائرنگ سے سوشل میڈیا ویڈیو بنانے والی لڑکی جاں بحق

پنجاب کے شہر جہلم میں بھائیوں نے سوشل میڈیا کے لیے ویڈیو بنانے والے اپنی 20 سالہ بہن کو فائرنگ کرکے قتل کردیا۔

جہلم پولیس کے مطابق ڈھوک کوریاں کے علاقے میں 20 سالہ لڑکی اپنے سوشل میڈیا اکاؤنٹ کے لیے ویڈیو بنا رہی تھی، جس پر ان کے بھائیوں نے فائرنگ کی، جس کے نتیجے میں لڑکی جاں بحق ہوگئیں۔

واقعے کے حوالے سے پولیس نے بتایا کہ لڑکی کے قتل کو ان کے اہل خانہ کی جانب سے چھپانے کی کوشش کی گئی اور اس سے خودکشی کا شاخسانہ قرار دیا گیا  تاہم پولیس نے شواہد کی بنیاد پر اس سے قتل قرار دیا۔

پولیس کا کہنا تھا کہ جائے وقوع سے تمام شواہد اکٹھے کرلیے گئے اور پولیس کی مدعیت میں ہی لڑکی کے قتل کا مقدمہ درج کرلیا گیا، مقدمے میں مقتولہ کے دو بھائیوں اور چچا کو نامزد کردیا گیا ہے۔

انہوں نے کہا کہ مقدمہ درج کرنے کے بعد دونوں بھائیوں اور مقتولہ کے چچا کو گرفتار کرلیا گیا ہے۔

پولیس نے مزید بتایا کہ پوسٹ مارٹم کے لیے لڑکی کا جسد خاکی ڈسٹرکٹ ہیڈاکوارٹر اسپتال (ڈی ایچ کیو) جہلم منتقل کردیا گیا اور مزید تفتیش جاری ہے۔