کراچی میں فائرنگ سے مسجد کے امام سمیت مؤذن جاں بحق 6 افراد زخمی

مسجد کے باہر فائرنگ سے 4افراد زخمی ہوگئے جن میں سے امام مسجد سمیت مؤذن راستے میں ہی دم توڑ گئے فوٹو:فائل

---

شہر کے مختلف علاقوں میں فائرنگ سے مسجد کے امام اور موذن جاں بحق جبکہ 6 افراد زخمی ہوگئے۔

ایکسپریس نیوز کےمطابق کراچی کے علاقے گلشن اقبال 13 ڈی میں نامعلوم مسلح افراد نے مسجد کے باہر اندھا دھند فائرنگ کردی جس کےنتیجے میں 4 افراد شدید زخمی ہوگئے جنہیں طبی امداد کے لیے اسپتال منتقل کیا جارہا تھا کہ 2 افراد راستے میں ہی دم توڑ گئے۔

پولیس کے مطابق جاں بحق ہونےوالوں میں مسجد کے امام مولانا احتشام اور مؤذن قاری حفیظ شامل ہیں،چاروں افراد مسجد کےباہر چندہ جمع کررہے تھے کہ اس دوران ان پر فائرنگ کی گئی،واقعے میں جاں بحق افراد کی لاشوں کو ضابطے کی کارروائی کے لئے اسپتال منتقل کردیا ہے جبکہ فائرنگ سے زخمی ہونے والوں کو طبی امداد فراہم کی جارہی ہے۔

دوسری جانب کریم آباد میں نامعلوم مسلح افراد نے کار پر فائرنگ کردی جس کے نتیجے ایک شخص زخمی ہوگیا جسے فوری طبی امداد کے لیے اسپتال منتقل کردیا گیا ہے جب کہ کورنگی بلال ٹاؤن میں فائرنگ سے 2 افراد اور نیو کراچی انڈا موڑ پر بھی فائرنگ سے ایک شخص زخمی ہوگیا۔