سلمان خان اور عمران ہاشمی کو پاکستان میں پسند کیا جاتا ہے عمائمہ ملک

ہندوستانی بن کر کام کرونگی، میں فنکار ہوں مجھے سرحدوں میں قید نہ کیا جائے، گفتگو فوٹو : فائل

---

پاکستانی اداکارہ اور ماڈل عمائمہ ملک کا کہنا ہے کہ سلمان خان اور عمران ہاشمی کو پاکستان میں بہت پسند کیا جاتا ہے۔

ادکارہ فلم نٹور لال میں عمران ہاشمی کے ساتھ بالی ووڈ انڈسٹری میں ڈیبیو کرینگی۔ عمائمہ نے کہا کہ پاکستان کی عوام عمران ہاشمی کو پاکستانی تصور کرتے ہیں۔ اداکارہ نے کہا کہ مجھے امید ہے کہ فلم نٹور لال کو بھی پاکستان میں پسند کیا جائے گا اور فلم کامیاب ہوگی۔ نٹور لال انتیس اگست کو سینما گھروں کی زینت بنے گی۔ پاکستانی فلم بول سے سرخیوں میں آنے والی اداکارہ عمائمہ ملک بالی ووڈ میں اپنے قدم کیسے جما سکیں گی یہ ان کے لیے انتہائی مشکل ہے۔ تاہم اس سوال پر وہ قدرے ناراض بھی ہو جاتی ہیں۔

وہ کہتی ہیں ''آپ مجھے غیر ملکی کیوں تصور کرتے ہیں' میں تو فنکار ہوں' برائے مہربانی مجھے کسی سرحد میں قید نہ کریں' مجھے امید ہے کہ ہندوستان اور پاکستان دونوں ہی جگہ کے ناظرین مجھے پسند کریں گے' میں یہاں ہندوستان میں آپ ہی لوگوں جیسا بن کر کام کروں گی''۔