مائی کلاچی ریلوے پھاٹک پر مال گاڑی کی آئل ٹینکر سے ٹکر کے باعث بڑے حادثے کا شکار ہوا، جس کے نتیجے میں متعدد ٹینکرز اور ٹرالر بھی آپس میں ٹکرا گئے۔
اس حادثے میں آئل ٹینکر کا ڈرائیور اپنے کیبن میں پھنس کر رہ گیا، جسے ایدھی کے رضاکاروں اور شہریوں کی مدد سے نکال کر زخمی حالت میں اسپتال منتقل کیا گیا۔
حادثے کے باعث مائی کلاچی روڈ، ایم ٹی خان روڈ اور بوٹ بیسن پر شدید ٹریفک جام ہو گیا۔
تفصیلات کے مطابق مائی کلاچی ریلوے پھاٹک پر مال گاڑی کی آئل ٹینکر سے ٹکر کے نتیجے میں آئل ٹینکر مکمل طور پر تباہ ہوگیا، جبکہ اس کا ڈرائیور کیبن میں پھنس گیا۔
ٹکر کے بعد ٹینکر کے عقب میں موجود دیگر ٹینکرز اور ٹرالر بھی بے قابو ہو کر آپس میں ٹکرا گئے، جس سے حادثے کی شدت میں مزید اضافہ ہوا۔
ایدھی کی رضاکاروں، پولیس اور مقامی شہریوں نے تقریباً ایک گھنٹے کی جدوجہد کے بعد ٹینکر کے اگلے حصے کو توڑ کر زخمی ڈرائیور کو باہر نکالا اور جناح اسپتال منتقل کیا۔ زخمی ڈرائیور کی شناخت 50 سالہ عبد الستار کے طور پر ہوئی ہے۔
حادثے کے باعث مائی کلاچی روڈ، ایم ٹی خان روڈ اور بوٹ بیسن پر ٹینکرز اور ٹریلرز کی لمبی قطاریں لگ گئیں، جس سے ٹریفک کی روانی متاثر ہوئی۔
ٹریفک پولیس کے مطابق حادثے کے باعث مائی کلاچی روڈ جانب بوٹ بیسن ٹریفک کے لیے بند ہے جبکہ ٹریفک کو ایم ٹی خان روڈ جانب پی آئی ڈی سی کی طرف اور بوٹ بیسن سے یو ٹر ن کروا کر اور بلاول چورنگی کی طرف بھیج رہے ہیں۔
ترجمان ٹریفک پولیس نے عوام الناس سے گزارش کی ہے کہ زحمت اور پریشانی سے بچنے کے لئے متبادل راستوں کے انتخاب کریں۔
ٹریفک پولیس حکام کے مطابق مائی کلاچی روڈ کو عارضی طور پر بند کر دیا گیا تھا، لیکن بعد ازاں کرین کی مدد سے ٹینکر کو مال گاڑی سے جدا کیا گیا اور ٹریفک کی روانی بحال کرائی جا رہی ہے۔
ریلوے پھاٹک پر تعینات گیٹ کیپر کے مطابق، مال گاڑی کی آمد پر اس نے ٹینکر اور دیگر گاڑیوں کو روکنے کے لیے لائٹ دکھائی تھی، مگر ٹینکر کی رفتار زیادہ تھی اور وہ نہیں رک سکا۔
تاہم عینی شاہدین نے الزام عائد کیا ہے کہ گیٹ کیپر سو رہا تھا اور پھاٹک پر لائٹ نہیں دکھائی گئی۔ ریلوے حکام واقعے کی تحقیقات کر رہے ہیں۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔