جتنی عمر لکھی ہے... سلمان خان کا لارنس بشنوئی کی قتل کی دھمکیوں پر ردعِمل

بعض اوقات، بہت سارے لوگوں کے ساتھ گھومنا پھرنا ایک مسئلہ بن جاتا ہے

ویب ڈیسک | March 27, 2025

بالی ووڈ کے دبنگ اداکار سلمان خان نے لارنس بشنوئی کی جانب سے ملنے والی جان سے مارنے کی دھمکیوں پر اپنا ردعمل دے دیا۔ 

انہیں مسلسل جان سے مارنے کی دھمکیوں پر بات کرتے ہوئے بالی ووڈ سپر اسٹار سلمان خان نے کہا ہے کہ ان کی زندگی خدا کے ہاتھ میں ہے۔

عید پر ریلیز ہونے والی فلم سکندر کے پروموشنل پروگرام کے دوران بھائی جان سے دھمکیوں کے بارے میں ردعمل پوچھا گیا جس کے جواب میں ان کا کہنا تھا کہ ’اللہ، سب اُن پر ہے، جیتنی عمر لکھی ہے، اتنی لکھی ہے، بس یہ ہے‘۔

59 سالہ اداکار نے دھمکیوں اور ممبئی کے اپنے اپارٹمنٹ کے قریب شوٹنگ کے بعد انہیں فراہم کیے گئے سخت حفاظتی اقدامات سے پیدا ہونے والے چیلنجز کو تسلیم کیا۔ ان کا کہنا تھا کہ ’بعض اوقات، بہت سارے لوگوں کے ساتھ گھومنا پھرنا ایک مسئلہ بن جاتا ہے‘۔

یاد رہے کہ گزشتہ برس اپریل میں، بائیک پر سوار دو افراد نے باندرہ کے گلیکسی اپارٹمنٹس کے باہر، جو سلمان  خان کی رہائش گاہ ہے متعدد گولیاں چلائیں۔ بعد ازاں تحقیقات سے پتہ چلا کہ اس حملے کا مقصد اداکار کو ڈرانا تھا اور یہ حملہ گینگسٹر لارنس بشنوئی کی ہدایت پر کیا گیا تھا۔

لارنس بشنوئی جو گجرات کی جیل میں قید ہے، سلمان خان سے 1998 کے کالے ہرن کے قتل کیس پر برہم ہے، جس میں وہ ملزم تھے۔ بشنوئی برادری کالے ہرن کو مقدس مانتی ہے اور اس کا شکار کرنے کی وجہ سے اداکار کو کئی سالوں سے مسلسل دھمکیاں مل رہی ہیں۔