پاکستان اور ازبکستان کا آئی ٹی اور ٹیلی کام میں جوائنٹ ورکنگ گروپ کے قیام پر اتفاق

وفاقی وزیر برائے انفارمیشن ٹیکنالوجی اور ٹیلی کمیونیکیشن شزہ فاطمہ خواجہ نے کہا ہے کہ پاکستان سائبر سیکیورٹی میں مستحکم صلاحیت رکھتا ہے اور بہتر کنیکٹیویٹی سے وسطی ایشیائی ریاستوں کے لیے کم تاخیر کی سہولت میں بہتری ممکن ہوگی۔

وزارت انفارمیشن ٹیکنالوجی اور ٹیلی کمیونیکیشن سے جاری بیان کے مطابق پاکستان اور ازبکستان کے درمیان ڈیجیٹل شراکت داری کو وسعت دینے پر بات چیت کی گئی جہاں ازبک سفیر علیشیر تختایو نے وفاقی وزیر آئی ٹی و ٹیلی کام شزہ فاطمہ خواجہ سے ملاقات کی۔

وفاقی وزیر آئی ٹی نے کہا کہ پاکستان سائبر سیکیورٹی میں مستحکم صلاحیت رکھتا ہے، ہمارے پاس این سی ای آر ٹی اور این ٹی آئی ایس بی جیسے ادارے موجود ہیں۔

بیان میں کہا گیا کہ ملاقات میں پاکستان اور ازبکستان کے درمیان تمام ڈیجیٹل خدمات کے لیے ون ونڈو سسٹم کے قیام اور شراکت داری، ٹیکنالوجی منصوبوں کے لیے وینچر کیپیٹلز کے قیام پر تبادلہ خیال کیا گیا۔

فریقین نے نوجوانوں خصوصاً خواتین کے لیے ڈیجیٹل اسکلز ٹریننگ پروگرامز کے انعقاد پر غور کیا، تعلیمی تعاون، بشمول مشترکہ اور تبادلہ پروگرامز کے فروغ کی تجویز دی گئی۔

وفاقی وزیر اور ازبک سفیر کے درمیان ملاقات میں انکیوبیشن سینٹرز اور سائبر سیکیورٹی کے شعبے میں شراکت داری پر اتفاق کیا گیا۔

ازبک سفیر نے آئی ٹی اور ٹیلی کام وزرا کے باہمی دوروں کی ضرورت پر زوردیا، ملاقات میں نئی ابھرتی ہوئی ٹیکنالوجیز میں تعاون کے معاہدے پر دستخط کی تجویزدی گئی اور آئی ٹی اور ٹیلی کام کے شعبے میں جوائنٹ ورکنگ گروپ کے قیام پر اتفاق کیا گیا۔

وزارتِ آئی ٹی نے ازبکستان کے ساتھ تعاون کے لیے ایکشن پلان وزارت خارجہ کے ذریعے شیئر کر دیا، وفاقی وزیر آئی ٹی نے ازبک سفیر کی تجاویز سے اتفاق کیا اور انہوں نے دوطرفہ آئی ٹی اور ٹیلی کام تعاون کو مواقع سے بھرپور قرار دیا۔

بیان میں کہا گیا کہ وفاقی وزیر آئی ٹی نےوسطی ایشیا کے لیے واخان کوریڈور اور چین (ڈیجیٹل سلک روڈ) کے ذریعے او ایف سی کنیکٹیویٹی کی اہمیت پر زور دیا اور کہا کہ بہتر کنیکٹیویٹی سے وسطی ایشیائی ریاستوں کے لیے کم تاخیر (لو لیٹینسی) کی سہولت میں بہتری ممکن ہوگی۔

ملاقات میں پاکستان میں موجود 8 قومی انکیوبیشن سینٹرز میں دوطرفہ اسٹارٹ اپ تعاون کے امکانات پر گفتگو کی گئی۔

ازبک سفیرنے کہا کہ ازبکستان وسطی ایشیا کا مرکز ہے جہاں 18 ملین کی آبادی ہے، ازبک سفیر نے دوطرفہ اسٹارٹ اپ ایکو سسٹم کے قیام کی تجویز دی۔