کندھ کوٹ میں بھنگوار اور بھٹو برادری کے درمیان فائرنگ کے نتیجے میں دونوں اطراف کے چار افراد ہلاک اور متعدد زخمی ہوگئے۔
ایکسپریس نیوز کے مطابق فائرنگ کا واقعہ بڈانی ایٹ میانی تھانے کی حدود میں پیش آیا، قتل ہونے والوں میں بھٹو برادری کے دو اور بھنگوار برادری کے بھی دو افراد شامل ہیں۔
ذرائع کے مطابق دونوں فریقین میں فائرنگ کا سلسلہ جاری اور دونوں فریقین مورچہ بند ہوگئے ہیں، تصادم کے سبب بڈانی شہر مکمل طور پر بند ہے اور علاقے میں خوف و ہراس کی فضا قائم ہے، دونوں گروپوں میں مزید جانی نقصان ہونے کا خدشہ ہے۔
واضح رہے کہ دونوں گروپوں کے درمیان گزشتہ روز گدھا گاڑی کے معاملہ پر تصادم ہوا تھا، قانون کا خوف نہ ہونے کی وجہ سے مسلح افراد سرعام شہر میں اسلحہ کے ساتھ گھوم رہے ہیں۔
اس واقعے کے بعد وزیر داخلہ سندھ ضیاء الحسن لنجار نے ایس ایس پی کشمور سے ابتدائی پولیس کارروائی پر مشتمل تفصیلات طلب کرلیں۔
ضیاء الحسن لنجار نے کہا ہے کہ قانون کی رٹ اور امن وامان کے حالات کے خلاف جانے والوں سے سختی کے ساتھ نمٹا جائے، واقعہ میں ملوث ملزمان اور ان کے سرپرستوں سے کوئی رعایت نہ برتی جائے، فساد پھیلانے والے عناصر کی بیخ کنی اشد ضروری ہے، شہر میں پولیس گشت بڑھایا جائے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔