|
پنجاب کے ضلع اوکاڑہ میں اسٹیج ڈانسر چندہ علی کو جنسی زیادتی کے بعد قتل کردیا گیا۔ رپورٹ کے مطابق اوکاڑہ تھانہ گوگیرا کی حدود 34 جیڑی سے خاتون کی لاش برآمد ہوئی، معاملے کا ڈسٹرکٹ پولیس افسر (ڈی پی او) اوکاڑہ راشد ہدایت نے نوٹس لیا۔ قتل ہونے والی لڑکی کا نام چندہ علی تھا، وہ اسٹیج ڈانسر تھی جو کہ کل عارف والا سے مہندی کا فنکشن کرنے آئی تھی۔ رپورٹ کے مطابق نامعلوم ملزمان فائرنگ کر کے خاتون کو قتل کیا اور رات گئے لاش کو قریبی کھیتوں میں پھینک کر فرار ہوگئے۔ لواحقین کا کہنا تھا کہ ہماری بیٹی کو زیادتی کے بعد قتل کیا گیا ہے جب کہ حکام نے کہا کہ میڈیکل رپورٹ آنے کے بعد حقائق سامنے آئیں گے۔ ترجمان پولیس عرفان سندھو کے مطابق اطلاع پر تھانہ گوگیرا پولیس موقعے پر پہنچی اور لاش کو پوسٹ مارٹم کے لیے ڈی ایچ کیو اسپتال منتقل کیا۔ ترجمان پولیس نے کہا کہ مزید تحقیقات جاری ہیں، ڈی پی او اوکاڑہ نے ملزمان کی فوری گرفتاری کے لیے متعلقہ ایس ایچ او کو ہدایت جاری کردی ہے۔ لاش کی شناخت نہ ہونے پر پہلے ہی پولیس کی مدعیت میں ایف آئی آر درج کی جا چکی ہے، پولیس ایپ کی مدد سے خاتون کی شناخت کی گئی، قتل کی گئی خاتون کا تعلق ضلع پاک پتن سے ہے۔ |
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔