کراچی بار کے صدرعامر وڑائچ مبینہ حملے میں زخمی

آئی آئی چندریگر روڈ کے قریب کراچی بار ایسوسی ایشن کے صدر عامر وڑائچ پر مبینہ طور پر نامعلوم افراد نے حملہ کردیا اور انہیں زخمی حالت میں سول اسپتال منتقل کردیا گیا۔

کراچی بارایسوسی ایشن کے صدرعامر نواز وڑائچ نے کہا کہ 6 افراد نے مجھ پر حملہ کیا ہے لیکن ہم 6 کینالز کے معاملے سے پیچھے نہیں ہوں گے اور12 اپریل کو جو وکلا کنونشن ہے وہ جاری رہے گا۔

انہوں نے کہا کہ 6 کینالز بند نہ کی گئی تو 732 گھنٹہ میں سندھ اور پنجاب بارڈر بند کر دیں گے، ریلوے ٹریک کو بھی بند کر دیا جائے گا۔

وکیل رہنما نے کہا کہ میں اس واقعے کی ایف آئی آر درج نہیں کروا رہا لیکن ہم اپنے مقصد سے پچھے نہیں ہوں گے۔

ایس ایس پی سٹی عارف عزیز کے مطابق شواہد جمع کیے جارہے ہیں اور ابتدائی تفتیش کے مطابق واقعہ آئی آئی چندریگر روڈ پر واقع کیفے بوگی پر پیش آیا۔

ان کا کہنا تھا کہ واقعے میں ملوث ملزمان کے خلاف کارروائی کی جائے گی۔

سندھ بار کا عدالتوں میں ہڑتال کا اعلان

سندھ بار کونسل نے صدر کراچی بارعامر وڑائچ پر مبینہ حملے کی شدید مذمت کرتے ہوئے  صوبے بھر کی عدالتوں میں ہڑتال کا اعلان کردیا۔

سندھ بار کونسل نے بیان میں کہا کہ صدر کراچی بار پر حملہ قانون نافذ کرنے والے اداروں کی ناکامی ہے، قانون نافذ کرنے والے ادارے وکلا کو تحفظ فراہم کرنے میں ناکام ہیں۔

بیان میں کہا گیا کہ آئی جی سندھ اوردیگر حکام واقعے کا فوری نوٹس لیں، ذمہ داران کے خلاف مقدمہ درج کرکے گرفتار کیا جائے، وکلا اور ان کے اہل خانہ کو تحفظ فراہم کیا جائے۔