کنگنا رناوت 1 لاکھ کا بجلی کا بل موصول ہونے پر ریاستی حکومت پر برس پڑیں

’اس مہینے میرے منالی کے گھر کا 1 لاکھ بجلی کا بل آیا جہاں میں رہتی بھی نہیں ہوں‘

ویب ڈیسک | April 09, 2025

بالی ووڈ کی بےباک اداکارہ بی جے پی کی ایم پی اور لوگ سبھا کی رُکن کنگنا رناوت 1 لاکھ روپے کا بجلی کا بِل موصول ہونے پر ریاستی حکومت پر برس پڑیں۔

کنگنا رناوت نے حال ہی میں ریاست ہماچل پردیش میں موجود اپنے منالی کے گھر (جہاں وہ رہائش پذیر نہیں ہیں) کے لیے 1 لاکھ روپے کا بجلی کا بل وصول کرنے کے بعد ہماچل پردیش حکومت کو تنقید کا نشانہ بنایا ہے۔

لوک سبھا رُکن نے مایوسی کا اظہار کرتے ہوئے کہا کہ ایک غیر آباد گھر کے لیے جہاں کوئی رہتا ہی نہیں اتنا زیادہ بل بھیجنا ریاست کی طرز حکمرانی پر بری طرح جھلکتا ہے۔

اداکارہ نے بھاری بل موصول ہونے پر حیرت کا اظہار کرتے ہوئے کہا کہ ’اس مہینے میرے منالی کے گھر کا 1 لاکھ بجلی کا بل آیا جہاں میں رہتی بھی نہیں ہوں، اتنی دردشا کی ہوئی ہے، ہم پڑھتے ہیں تو شرمندگی ہوتی ہے کہ یہ کیا ہو رہا ہے‘۔

کنگنا نے یہ تبصرے ہماچل پردیش میں ایک سیاسی تقریب کے دوران کیے، جہاں انہوں نے اپنی پارٹی کے لوگوں پر زور دیا کہ وہ ریاست کے حالات کو بہتر بنانے کے لیے کام کریں۔

یاد رہے کہ کنگنا رناوت نے 2024 میں سیاسی دنیا میں قدم رکھا۔ انہوں نے منڈی، ہماچل پردیش سے لوک سبھا کا الیکشن لڑا اور فاتح بن کر ابھری۔ بھارتیہ جنتا پارٹی (بی جے پی) میں شامل ہونے اور منڈی پارلیمانی سیٹ جیتنے کے بعد سے، وہ پارٹی کے لیے حمایت میں آواز اٹھا رہی ہیں۔