بھارت میں ایک نالے سے ایک لاش ملی تھی جسے چادر میں لپیٹ کر پتھر اور سیمنٹ کے تھیلے سے باندھ کر پھینکا گیا تھا۔
بھارتی میڈیا کے مطابق دہلی پولیس نے ایک ماہ سے جاری مسلسل تفتیش کے بعد نہ صرف لاش کی شناخت کرلی بلکہ قاتل کا بھی پتا چلا لیا۔
نالے سے ملنے والی لاش کی شناخت نہیں ہوپا رہی تھی۔ پولیس نے لاش کی ناک سے لونگ نکال کر پتا کرایا کہ کس جیولر کی ہے۔
جیولر کی مدد سے پولیس کو پتا چلا کہ یہ لونگ انیل کمار نامی بزنس مین نے خریدی تھی جو گڑگاؤں کے ایک فارم ہاؤس میں رہتے ہیں۔
پولیس نے بزنس مین شوہر سے پوچھ گچھ کی تو اُس نے بہانہ بنایا کہ بیوی گاؤں گئی ہوئی ہے اور اس کے پاس فون بھی نہیں ہے۔
پولیس کو شوہر پر شک ہوا تو گھر کی تلاشی لی اور ایک ڈائری سے خاتون کی بہن ببیتا کا نمبر لے کر فون کیا۔
ببیتا نے پولیس کو بتایا کہ ہم جے پور میں رہتے ہیں اور اپنی بہن سیما سے بات کرنے کے لیے بار بار فون کر رہے ہیں لیکن بہنوئی ٹال مٹول سے کام لے رہے ہیں۔
جس پر پولیس نے شوہر کو حراست میں لے کر تفتیش کا آغاز کردیا۔ آلہ قتل کی برآمدگی کے لیے مزید تفتیش جاری ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔