نائب وزیر اعظم اور وزیر خارجہ اسحاق ڈار نے سعودی عرب کے وزیر خارجہ شہزادہ فیصل بن فرحان سے ٹیلیفونک رابطہ کیا اور انہیں بھارت کے یک طرفہ اقدامات کے تناظر میں قومی سلامتی کمیٹی کے فیصلوں سے آگاہ کردیا۔
ترجمان دفترخارجہ سے جاری بیان کے مطابق پاکستان اور سعودی عرب کے وزرائے خارجہ نے دونوں ملکوں کے مابین موجودہ دوطرفہ تعلقات پر اطمینان کا اظہار کیا اور گفتگو کے دوران خطے کی صورت حال پر تبادلہ خیال کیا۔
وزیرخارجہ اسحاق ڈار نے شہزادہ فیصل بن فرحان کو بھارت کی جانب سے یکطرفہ اقدامات کے تناظر میں پاکستان کی قومی سلامتی کمیٹی کے فیصلوں سے آگاہ کیا۔
اسحاق ڈار نے بھارت کے بے بنیاد الزامات کو مسترد کرتے ہوئے خبردار کیا کہ ایسے اقدامات خطے میں مزید کشیدگی کا باعث بن سکتے ہیں۔
ترجمان دفترخارجہ کے مطابق انہوں نے کہا کہ کسی بھی جارحیت کا بھرپور اور مؤثر جواب دیا جائے گا اور دونوں رہنماؤں نے خطے کی بدلتی ہوئی صورت حال پر مشاورت اور رابطے جاری رکھنے پر اتفاق کیا۔
اسحاق ڈار کا ایرانی ہم منصب سے رابطہ
وزیر خارجہ اسحاق ڈار نے ایرانی ہم منصب سے بھی ٹیلیفونک رابطہ کیا اور گفتگو کے دوران انہوں نے پاکستان اور بھارت کے درمیان حالیہ صورت حال سے آگاہ کیا۔
اسحق ڈار نے بھارت کے بے بنیاد الزامات کو سختی سے مسترد کردیا اور بھارت کی جانب سے کسی بھی ممکنہ اشتعال انگیز اقدام کے خطرات سے آگاہ کیا۔
نائب وزیراعظم نے خطے میں کشیدگی کے خاتمے کے لیے ایران کی کوششوں کو سراہا اور عمان کے دارالحکومت مسقط میں کل ہونے والے ایران-امریکا مذاکرات کے لیے نیک خواہشات کا اظہار کیا۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔