ترکیہ کے شہر ارزروم میں چھٹا ای سی او ٹورازم وزارتی اجلاس منعقد ہوا جس میں لاہور کو ’’ٹورازم کیپٹل 2027ء‘‘ قرار دے دیا گیا، وزیراعلیٰ پنجاب نے کہا ہے کہ لاہور دنیا کے استقبال کے لیے تیار ہے۔
ایکسپریس نیوز کے مطابق تاریخی شہر لاہور کو پہلی بار دس ممالک کی تنظیم 'ای سی او ٹورازم کیپٹل' کا اعزاز مل گیا۔ ترکیہ کے شہر ازروم میں منعقدہ 'ای سی او' کے سیاحت کے فروغ کے چھٹے وزارتی اجلاس میں 2027 کے لیے لاہور کو 'ای سی او ٹورازم کیپیٹل' کا درجہ دیا گیا۔
وزیر زراعت عاشق کرمانی کی قیادت میں پاکستانی وفد کی موثر سفارت کاری سے، میری (ترکمانستان) اور کراکول (کرغزستان) کی نامزدگیاں واپس لے لی گئیں۔
لاہور کو 'ای سی او ٹورازم کیپیٹل' قرار دلانے کی کوششوں کا آغاز 2024 کے آغاز میں ہوا تھا۔ پاکستانی وفد کے سربراہ عاشق کرمانی نے طویل بات چیت کے بعد ترکمانستان اور کرغزستان کے سفیروں کو اپنے شہروں کی نامزدگیاں واپس لینے پر قائل کرلیا۔
پاکستانی وفد 25 اپریل کو 'ای سی او' ٹورازم کیپیٹل کے انتخاب کے لیے ازروم پہنچا تھا۔ پنجاب کے وفد میں ایم این اے علی اکبر، سیکریٹری سیاحت بھی شامل تھے۔
آٹھویں ،ای سی او' سیاحتی اور چھٹے وزارتی اجلاس میں لاہور کی تاریخ، ثقافت اور ورثے پر ڈاکومینٹری بھی دکھائی گئی۔ پنجاب کی وزارت سیاحت گزشتہ چار ماہ سے اس مقصد کے لئے کام کر رہی تھی۔
ازبکستان کے شہرِسبز کو یہ اعزاز پہلے مل چکا ہے، ترکیہ کے مشرقی اناطولیہ کے شہر اَذرُوم کو 2025 کے لئے ’ای سی او کیپٹل ٹورازم‘نامزد کیاگیا۔
وزیراعلی پنجاب مریم نوازشریف کی دعوت پر’ای سی او‘ کے سفیر لاہور کا دورہ کر چکے ہیں،’ای سی او‘ مستقل مندوبین کونسل کا اجلاس بھی ہوا تھا۔ ای سی او ہر سال دس میں سے ایک رُکن ملک کے شہر کو اس منفرد اعزاز کے لئے منتخب کرتا ہے۔
تاریخی، ثقافتی اور سیاحتی ورثے کے پس منظر کی وجہ سے لاہور کو ’ای سی او کیپٹل ٹورازم‘ نامزدگی کی گئی۔ لاہور کے ’ای سی او کیپٹل ٹورازم‘ قرار پانے سے پاکستان میں عالمی سیاحت فروغ پائے گی۔
ای سی او میں ترکیہ، ایران، افغانستان، پاکستان کے علاوہ آذربائیجان ، قزاغستان، کرغستان، تاجکستان، ترکمانستان اور ازبکستان کے ممالک شامل ہیں۔
وزیراعلیٰ پنجاب مریم نواز نے سماجی رابطے کی ویب سائٹ ایکس (ٹویٹر) پر کہا ہے کہ پاکستان اور پنجاب کے لیے قابلِ فخر اور تاریخی لمحہ ہے کہ لاہور کو ’’ای سی او ٹورازم کیپٹل 2027ء‘‘ کا اعزاز دیا گیا ہے، یہ اعزاز ترکیہ کے شہر ارضروم میں چھٹے ای سی او ٹورازم وزارتی اجلاس میں تاریخ ورثےاور محبتوں کے شہر لاہور کو دیا گیا ہے۔
وزیراعلیٰ پنجاب نے کہا ہے کہ شاندار تاریخی ورثے، رنگا رنگ ثقافت اور بے پناہ صلاحیتوں کے ساتھ، لاہور دنیا کے استقبال کے لیے تیار ہے، ای سی او ٹورازم کیپٹل 2027 کی حیثیت سے لاہور عالمی منظرنامے پر روشن مرکز ہونے جا رہا ہے۔
مریم نواز نے کہا کہ لاہور کو ٹورازم کیپٹل 2027ء منتخب کرنے پر ای سی او ممالک کا دل کی گہرائیوں سے شکریہ ادا کرتے ہیں، ای سی او کے اعتماد، حمایت اور تعاون کے ساتھ ہم پاکستان، پنجاب اور لاہور کے حسن کو دنیا کے سامنے لے کر آئیں گے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔