جو حکومت اسلام آباد میں امن قائم نہیں کرسکتی وہ ملک میں کیسے کرے گی سراج الحق

حکومت ملک میں امن قائم کرنے کے حوالے سے مکمل طور پر ناکام نظرآتی ہے،امیر جماعت اسلامی فوٹو: فائل

---

امیر جماعت اسلامی سراج الحق کا کہنا ہےکہ وفاقی حکومت مکمل طور پر ناکام ہوچکی ہے کیونکہ جو حکومت اسلام آباد میں امن قائم نہیں کرسکتی وہ ملک میں کیسے کرے گی۔

بنوں میں میڈیا سے بات کرتے ہوئے امیر جماعت اسلامی سراج الحق نے کہا کہ خیبرپختونخوا اسمبلی عوام کی امانت ہے اور صوبے میں حکومت کو ختم کرنا عوامی مینڈیٹ کی توہین ہوگی جبکہ عوام بھی صوبائی اسمبلی توڑنے سے متعلق بیانات کو مثبت نہیں سمجھتے۔ انہوں نے کہا کہ اسلام آباد میں فوج بلانا حکومت کا غلط فیصلہ ہے کیوں کہ جو حکومت اسلام آباد میں امن قائم نہیں کرسکتی وہ ملک میں کیسے کرے گی۔

سراج الحق کا کہنا تھا کہ وفاقی حکومت کراچی،بلوچستان اور وزیرستان میں بھی امن نہیں لاسکی، وزیراعظم نوازشریف کو چاہئے کہ وہ اپنی ذمہ داریاں پوری کریں۔ ان کا کہنا تھا کہ حکومت ملک میں امن قائم کرنے کے حوالے سے مکمل طور پر ناکام نظرآتی ہے۔