فیصل آباد میں زیر تعمیر مکان کی چھت گرنے سے 7 افراد جاں بحق 3 زخمی

زیرتعمیر مکان کی چھت گرنے سے 3 مزدور بھی شدید زخمی ہوگئے۔ فوٹو: فائل

---

زیر تعمیر مكان كی چھت گرنے سے ایک ہی خاندان كی 6 بچوں سمیت 7 افراد جاں بحق اور 3 شدید زخمی ہوگئے۔

جھنگ روڈ فیصل آباد پر واقع گاؤں ٹھیكری والا میں زیر تعمیر 2 منزلہ مكان كی اچانک چھت گر گئی جس کی زد میں آكر 45 سالہ حمیداں نامی خاتون اور ان كی 4 بیٹیاں 15 سالہ ثنا، 13 سالہ آمنہ، 10 سالہ صبا اور 8 سالہ شائستہ جبكہ وہاں ٹیوشن پڑھنے کے لئے آئے 2 جڑواں بھائی حماد اور بلال موقع پر جاں بحق جبكہ 3 مزدور شدید زخمی ہوگئے، واقعے کے بعد گاؤں میں سوگ كی فضا چھا گئی جب کہ اس موقع پر ہر آنکھ اشکبار نظرآئی۔

واقعے کے بعد اعلیٰ افسران سمیت پولیس کی نفری اور ریسکیو اہلکار موقع پر پہنچ گئے اور لاشوں اور زخمیوں کو اسپتال منتقل کردیا جہاں اسپتال ذرائع کے مطابق زخمی ہونے والے تینوں مزدوروں کی بھی حالت تسلی بخش نہیں۔