احتجاج کرنیوالے محکمہ صحت کے ملازمین پر لاٹھی چارج اور واٹر کینن کا استعمال

ویکسینیٹرز کو ریڈ زون میں داخل ہونے سے روکنے کے لیے واٹر کینن کا استعمال کیا جا رہا ہے (فوٹو ایکسپریس)

---

کراچی پریس کلب پر اپنے مطالبات کے حق میں مظاہرہ کرنے والے محکمہ صحت کے عارضی ویکسی نیٹرز پر پولیس نے ریڈ زون میں داخل ہونے کی کوشش پر لاٹھی چارج کیا اور واٹر کینن کا استعمال کرکے مظاہرین کو منتشر کردیا، پولیس نے موقع سے متعدد افراد کو حراست میں لے لیا،


تفصیلات کے مطابق کراچی پریس کلب پر اپنے مطالبات کے حق میں گذشتہ تین روز سے احتجاج پر بیٹھے ہوئے محکمہ صحت کے ویکسی نیٹرز نے وزیر اعلیٰ ہاؤس جانے کی کوشش میں ریڈ زون میں داخل ہونا چاہا جس پر پولیس کی بھاری نفری نے مظاہرین کو منتشر کرنے کے لیے لاٹھی چارج کیا، مظاہرین نے زبردستی ریڈ زون میں گھسنے کی دوبارہ کوشش کی تو پولیس نے واٹر کینن کے ذریعے مظاہرین کو منتشر کردیا،

احتجاج کے دوران پریس کلب اور صدر میں اطراف کی سڑکوں پر ٹریفک جام ہوگیا اور گاڑیوں کی طویل قطاریں لگ گئیں، پولیس نے احتجاج کرنے والے متعدد ویکسی نیٹرز کو گرفتار کرلیا، ویکسی نیٹرز کا مطالبہ ہے کہ 700 عارضی ویکسی نیٹرز کو مستقل کیا جائے اور تنخواہوں کی ادائیگی کے احکامات جاری کیے جائیں۔