مسلم لیگ (ق) کے مرکزی رہنما چوہدری پرویز الہیٰ نے کہا ہے کہ عدلیہ کو سیاسی معاملات میں فیصلے سنا کر اپنی عزت اور وقار پر آنچ آنے سے بچنا چاہئے۔
گجرات میں میڈیا سے بات کرتے ہوئے پرویز الہیٰ نے کہا کہ عوام کا سمندر تبدیلی کے لئے سڑکوں پر نکل آیا ہے اور اب یہ سمندر کنٹینر کو بہا لے جائے گا۔ انہوں نے لاہور ہائی کورٹ کے فیصلے کے حوالے سے کہا کہ جب عدلیہ کی بحالی کے لئے مارچ کیا گیا تو اس وقت کے چیف جسٹس اس کی قیادت کر رہے تھے اور میں وزیر اعلیٰ پنجاب تھا، آج اسی مارچ کی کامیابی کی وجہ سے عدالتیں آزادانہ فیصلے کر رہی ہیں لہٰذا عدلیہ کو چاہئے کہ وہ سیاسی معاملات میں فیصلے سنا کر اپنی عزت اور وقار پر آنچ نہ آنے دے۔