ناسا نے اپنے تاریخی خلائی پروگرام کے تحت ’آرٹیمس ٹو‘ راکٹ کو کامیابی کے ساتھ لانچ کر دیا ہے جو انسانوں کو تقریباً 50 سال بعد دوبارہ چاند کے قریب لے جانے والا اہم مشن ہے۔
یہ راکٹ امریکی ریاست فلوریڈا سے روانہ ہوا، جہاں سے اس نے اپنے طویل اور اہم سفر کا آغاز کیا۔ اس مشن میں چار خلا باز شامل ہیں جو تقریباً 10 دن کے دوران 6 لاکھ 85 ہزار میل کا سفر طے کریں گے۔
رپورٹس کے مطابق خلا باز چاند کے گرد چکر لگائیں گے لیکن اس مشن میں چاند پر لینڈنگ شامل نہیں ہے۔ اس کے بعد عملہ بحفاظت زمین پر واپس آئے گا۔
ماہرین کے مطابق یہ مشن مستقبل میں چاند پر انسانی لینڈنگ اور مزید خلائی تحقیقات کے لیے ایک اہم قدم ہے۔ اپالو مشنز کے بعد یہ پہلا موقع ہے کہ انسانوں کو دوبارہ چاند کے قریب بھیجا جا رہا ہے۔
ناسا کا کہنا ہے کہ آرٹیمس پروگرام کا مقصد چاند پر مستقل انسانی موجودگی قائم کرنا اور مستقبل میں مریخ سمیت دیگر سیاروں کے مشنز کے لیے راہ ہموار کرنا ہے۔
