شہریار خان پاکستان کرکٹ بورڈ کے بلا مقابلہ چیرمین منتخب

شہریار خان اس سے قبل 2003 سے 2006 تک بھی پاکستان کرکٹ بورڈ کے چیرمین رہ چکے ہیں۔ فوٹو؛آن لائن

---

نواب زادہ شہریار خان بلا مقابلہ پاکستان کرکٹ بورڈ کے چیرمین منتخب ہو گئے ہیں۔

ایکسپریس نیوز کے مطابق پی سی بی کے نئے آئین کے تحت چیف الیکشن کمشنر جسٹس ریٹائرڈ سائر علی کی سربراہی میں ہونے والے پہلے انتخابات میں 10 رکنی گورننگ بورڈ نے 80 سالہ شہریار خان کو کرکٹ بورڈ کا نیا چیرمین منتخب کیا، پی سی بی کی گورننگ باڈی میں 4 نمائندے ٹاپ ریجن سے، 4 ضلعی ریجن سے اور 2 ٹینکو کریٹس شامل تھے، پی سی بی نے چیرمین کے انتخابات کے لئے کاغذات جمع کرانے کی آخری تاریخ 15 اگست رکھی تھی تاہم اس دوران شہریار خان کے علاوہ کسی بھی امیدوار نے کاغذات جمع نہیں کروائے جس کے باعث وہ بلامقابلہ ہی چیرمین پی سی بی منتخب ہوگئے۔

واضح رہے کہ نواب زادہ شہریار خان اس سے قبل 2003 سے 2006 تک پاکستان کرکٹ بورڈ کے چیرمین جب کہ ماضی میں پاک بھارت کرکٹ ڈپلو میسی کے حوالے سے بھی اہم کردار ادا کر چکے ہیں اس کے علاوہ شہریار خان اردن، فرانس اور برطانیہ میں سفیر کے فرائض بھی انجام دے چکے ہیں۔