کسی بھی قیمت ایٹمی معاہدے پر دستخط نہیں کریں گے ایران
ایٹمی پروگرام پرمعاہدہ کرنے میں سنجیدہ ہیں تاہم مسائل کا ٹھوس حل بھی نکالا جائے، ایرانی رابطہ کار
ایٹمی معاہدے پر عالمی جوہری توانائی ایجنسی کے قوانین کے مطابق بات چیت کرنا چاہتے ہیں،ایران فوٹو:فائل
ایران نے کہا ہے کہ تحفظات دور کئے بغیر کسی بھی قیمت پر ایٹمی معاہدے پر دستخظ نہیں کئے جائیں گے۔
غیر ملکی خبر رساں ادارے کے مطابق ایران کے جوہری پروگرام کے رابطہ کار ماجد تخت روانچی کا کہنا ہے کہ اقوام متحدہ کی سلامتی کونسل کے مستقل ممبران کے ساتھ گزشتہ سال ہونے والے معاہدے کا آخری مرحلہ نومبر میں ہوگا تاہم اس سے قبل حتمی معاہدے کے لئے مزید بات چیت ضروری ہے اور ایران تحفظات دور کے بغیر معاہدے پر کسی بھی قیمت پر دستخط نہیں کرے گا۔ انہوں نے کہا کہ ایران 5 عالمی طاقتوں کے ساتھ ہر قسم کی بات چیت کے لئے تیار ہے اور ایٹمی معاہدے پر عالمی جوہری توانائی ایجنسی کے قوانین کے مطابق بات چیت کرنا چاہتا ہے۔
ایرانی جوہری پروگرام کے رابطہ کار کا مزید کہنا تھا کہ آئندہ ماہ سلامتی کونسل کے اجلاس سے قبل دونوں جانب سے مذاکرات کے دوسرے دور کا امکان ہے جبکہ وزارتی سطح پر بات چیت کا عمل جاری ہے جبکہ جی فائیو ممالک سے دوطرفہ بات جیت کے لئے تاریخ اور جگہ کا تعین ابھی نہیں ہوا۔ انہوں نے کہا کہ ایران ایٹمی پروگرام پر معاہدہ کرنے کے لئے سنجیدہ ہے تاہم اس حوالے سے مسائل کے ٹھوس حل کا بھی خواہاں ہے۔