پاکستان کرکٹ بورڈ (پی سی بی) نے پاکستان سپر لیگ کے گیارہویں ایڈیشن کے فائنل کے لیے آن لائن ٹکٹوں کی فروخت کا باضابطہ آغاز آج سے کر دیا ہے، جس کے بعد شائقین کرکٹ میں زبردست جوش و خروش دیکھا جا رہا ہے۔
پی سی بی کے مطابق فائنل میچ کے ٹکٹ آج شام 4 بجے سے آن لائن دستیاب ہیں جبکہ شائقین pcb.tcs.com.pk کے ذریعے اپنی نشستیں بک کر سکتے ہیں۔
ٹورنامنٹ کا فائنل 3 مئی کو قذافی اسٹیڈیم لاہور میں کھیلا جائے گا، جس کے لیے سیکیورٹی اور انتظامی تیاریاں بھی مکمل کر لی گئی ہیں۔
پی سی بی نے بتایا ہے کہ فزیکل ٹکٹس منگل سے لاہور میں قائم 18 ٹی سی ایس ایکسپریس سینٹرز پر دستیاب ہوں گے، جہاں سے شائقین مقررہ اوقات میں ٹکٹ حاصل کر سکیں گے۔
ٹکٹوں کی قیمتوں کو مختلف انکلوژرز کے مطابق تقسیم کیا گیا ہے۔ جنرل انکلوژر کی قیمت 1500 روپے سے شروع ہوتی ہے جبکہ فرسٹ کلاس 2000، پریمیم 4000 اور وی آئی پی انکلوژر کے ٹکٹ 6000 روپے میں دستیاب ہوں گے۔
اسی طرح وی وی آئی پی (وقار یونس انکلوژر) کے ٹکٹ 8000 روپے، ظہیر عباس انکلوژر کے 10 ہزار روپے جبکہ پی سی بی گیلری کے ٹکٹ 12 ہزار روپے مقرر کیے گئے ہیں۔
پی سی بی نے شائقین کو ہدایت کی ہے کہ وہ فائنل میچ سے قبل شام 6:30 بجے تک اسٹیڈیم پہنچ جائیں تاکہ اختتامی تقریب (کرٹن کلوزنگ سیرمنی) سے بھی لطف اندوز ہو سکیں۔
یاد رہے کہ رواں سیزن کے بیشتر میچز حکومتی پابندیوں کے باعث خالی اسٹیڈیمز میں کھیلے گئے، تاہم فائنل کے لیے شائقین کو اسٹیڈیم آنے کی خصوصی اجازت دی گئی ہے۔
