ٹارگٹ کلر اور اسٹریٹ کرمنل مقابلے میں مارا گیا مسروقہ موٹر سائیکلیں اور اسلحہ برآمد

سولجر بازار میں ملزمان ایک شخص سے موبائل چھین رہے تھے، پولیس کو دیکھ کر فائرنگ کردی، جوابی کارروائی میں ایک مارا گیا۔ فوٹو: فائل

---

ٹارگٹ کلراوراسٹریٹ کرمنل مقابلے میں مارا گیا، پولیس نے ہلاک ملزمان کے قبضے سے اسلحہ مسروقہ موٹر سائیکلیں اور چھینا گیا سامان برآمد کرلیا۔

تفصیلات کے مطابق قائد آباد کے علاقے جیکب لائن مجید کالونی سیکٹرII میں پولیس نے مبینہ مقابلے میں ٹارگٹ کلر سعید قادر عرف سعیدا ولد منتظی خان کو ہلاک کر دیا جبکہ اس کا ساتھی موقع سے فرار ہو گیا، ہلاک ہونے والے ملزم کی لاش جناح اسپتال لائی گئی، قائدآباد تھانے کے ہیڈ محرر نے بتایا کہ پولیس نے ہلاک ہونے والے ملزم کے قبضے سے ایک ٹی ٹی پستول اور چھینی گئی ایک موٹر سائیکل برآمد کرلی۔

ہلاک ملزم نے12 اگست2014 کوگل احمد چورنگی کے قریب پولیس کے اے ایس آئی جمیل کو فائرنگ کر کے ہلاک کیا تھا جس کی ایف آئی آر نمبر 336/14 قتل اور دہشت گردی ایکٹ کے تحت قائد آباد تھانے میں درج کی گئی تھی جبکہ ملزم قتل، اقدام قتل، بھتہ خوری اور ڈکیتی کے 52 مقدمات میں مطلوب تھا، سولجر بازار کے علاقے نشتر روڈ البیلا سگنل کے قریب پولیس مقابلے میں 35 سالہ اسٹریٹ کرمنل ہلاک ہوگیا جس کی لاش سول اسپتال پہنچائی گئی۔

ایس ایچ او سولجربازار انسپکٹر رافع تنولی نے بتایا کہ پولیس نے ہلاک ہونے والے ملزم کے قبضے سے ایک پستول، ایک موٹر سائیکل، 2 موبائل فون اور چھینے گئے 2 پرس برآمد کیے ہیں، ہلاک ہونے والے ملزم کا ایک ساتھی زخمی حالت میں فرار ہوگیا، سولجر بازار کے علاقے میں ملزمان ایک شخص سے موبائل فون اور نقدی چھین رہے تھے۔

پولیس کو دیکھ کر ملزمان نے فرار ہوتے ہوئے فائرنگ کر دی اورجوابی کارروائی کے نتیجے میں ایک ملزم ہلاک اورساتھی فرارہوگیا، ہلاک ہونے والے ملزم کے قبضے سے ایسی کوئی چیز نہیں ملی جس سے اس کی شناخت ہوسکے، پولیس نے پوسٹ مارٹم اور ضابطے کی کارروائی کے بعد لاش شناخت ورثا کے لیے ایدھی سرد خانے منتقل کر دی اور پولیس مقابلہ کا مقدمہ درج کر لیا۔