چین میں پاکستانی سفارت خانے نے تیسرے پاکستان پروفیشنلز اینڈ اسٹوڈنٹس فورم 2026 کی میزبانی کی جس کی تھیم اسٹیم کنیکٹ: انوویشن، مینٹرشپ اینڈ کولیبوریشن رکھی گئی۔
تھیم کے تحت چین بھر سے پاکستانی طلبا، محققین، ماہرین تعلیم اور پیشہ ور افراد کو پلیٹ فارم پر لایا گیا جس میں اُن کی صلاحیتوں کو نیٹ ورکنگ، ٹیکنا لوجی، کوآرڈینیشن اور ٹیکنالوجی کے دیگر شعبوں میں مزید کارآمد بنانا تھا۔
فورم میں سات پروفیشنز شامل تھے جن میں الیکٹریکل اینڈ کنٹرول سسٹم، کیمیکل اور میٹریل سائنسز، مصنوعی ذہانت اور کمپیوٹر سائنس، حیاتیاتی اور زرعی سائنس، سول، ماحولیاتی اور حفاظتی انجینئرنگ، ارتھ سائنسز اور مکینیکل، ایرو اسپیس اور توانائی کے مضامین شامل ہیں۔
شرکا نے تعلیمی ترقی، تحقیقی تعاون، کیریئر کے راستوں اور پاک چین تعاون میں ابھرتے ہوئے مواقع پر بات چیت کی۔ چین میں پاکستان کے سفیر، ایچ ای جناب خلیل ہاشمی نے اپنے تبصروں میں، سفارت خانے کی مسلسل کوششوں پر روشنی ڈالی تاکہ بامقصد پلیٹ فارمز تخلیق کیے جائیں جو چین بھر میں پاکستانی طلباء اور پیشہ ور افراد کو جوڑیں اور کمیونٹی، رہنمائی اور پیشہ ورانہ تعاون کے احساس کو مضبوط کریں۔
انہوں نے کہا کہ یہ فورم پاکستان اور چین کے درمیان انسانی سرمائے کی ترقی، اختراعات اور مہارتوں کی شراکت داری پر سفارت خانے کی وسیع تر توجہ کی عکاسی کرتا ہے۔
سفیر نے تعلیمی اور پیشہ ورانہ ترقی کو صنعتی ضروریات کے ساتھ ہم آہنگ کرنے کی اہمیت پر زور دیا اور بتایا کہ سفارت خانہ زراعت، برقی آلات، گھریلو آلات، بیٹری اور پاور اسٹوریج سسٹمز اور ٹیلی کمیونیکیشنز اور آئی سی ٹی میں سیکٹر پر مرکوز مصروفیات کے ذریعے ٹیکنیکل اینڈ ووکیشنل ایجوکیشن اینڈ ٹریننگ میں تعاون کو فعال طور پر فروغ دے رہا ہے۔
