کوئٹہ اور دالبندین میں ایف سی کی کارروائی کے دوران اسلحہ اور بارودی مواد برآمد 3ملزمان گرفتار

برآمد کئے گئے اسلحے میں بارودی سرنگیں اور راکٹ لانچر بھی بڑی تعداد میں برآمد ہوئے ہیں۔ فوٹو: فائل

---

بلوچستان کے مختلف علاقوں میں ایف سی نے کارروائی کرتے ہوئے 3 ملزمان کو گرفتار کرکے بھاری مقدار میں اسلحہ اور بارودی مواد برآمد کرلیا۔

ایکسپریس نیوز کے مطابق ایف سی نے خفیہ اطلاع پر کوئٹہ کے نواحی علاقے نیو کہان مری میں سرچ آپریشن کے دوران ایک خالی پلاٹ میں چھپائی گئی جدید خودکار بندوقیں، 4 راکٹ لانچر،120 مارٹرگولے، 86 بارودی سرنگیں ، 58 دستی بم، جدید رائفلیں اور 80 کلوگرام دھماکا خیزمواد برآمد کرلیا۔

دوسری جانب ایف سی نے دالبندین کی فیصل کالونی میں ایک مکان پر چھاپہ مار کر 3 ملزمان کو گرفتارکرکے اسلحہ، سیٹیلائٹ فون اور دیگر سامان برآمد کرلیا۔