میر پور بٹھورو میں تیز رفتار پک اپ الٹنے سے 15 افراد زخمی
متاثرین کا تعلق ایک ہی خاندان سے ہے، زخمیوں میں 4 خواتین بھی شامل، حادثہ ٹائر پھٹ جانے کے باعث پیش آیا
ٹائر برسٹ ہونے کے باعث پک اپ الٹ گئی جس کے نتیجے میں 4 خواتین سمیت 15 افراد زخمی ہوگئے۔
تفصیلات کے مطابق میرپور بٹھورو کے قریب سعید داھ اسٹاپ پر ماتلی جانے والی پک اپ ٹائر برسٹ ہونے کے باعث الٹ گئی جس کے نتیجے میں شورا برادری سے تعلق رکھنے والے ایک ہی خاندان کی 4 خواتین قائم خاتون، بھاگی، روشن بانو، گلاب جان اور اصغر شورو، الھڈنو شورو، شاہد عبدالکریم سمیت 15 افراد شدید زخمی ہوگئے جنھیں لوگوں نے اپنی مدد آپ کے تحت تعلقہ اسپتال میر پور بٹھورو پہنچایا جہاں انھیں طبی امداد دی گئی۔
ایم ایس ڈاکٹر بشیر سموں کا کہنا تھا کہ تمام افراد کی حالت خطرے سے باہر ہے۔ حادثے کا شکار ہونے والا خاندان تعلقہ میرپور ساکرو اور گھوڑا باری کے گاؤں شور کی اور مردانی کا رہائشی ہے جو ماتلی میں کسی حکیم سے علاج کرانے کیلیے جارہے تھے۔