افغانستان کے کرکٹر قیس احمد نے بنگلادیش کے خلاف ٹیسٹ میچ کے آخری اوور میں میدان میں ایسا انداز اپنایا جس نے شائقین کو گل بدین نائب کے مشہور میم کی یاد دلا دی۔
میچ انتہائی دلچسپ صورتحال میں داخل ہوچکا تھا جب پانچویں روز کھیل کے اختتام میں چند منٹ باقی تھے اور بنگلادیش کو جیت کے لیے صرف 2 وکٹیں درکار تھیں۔
اس دوران قیس احمد نے وقت ضایع کرنے کے لیے مصنوعی انجری کا بہانہ کیا تاکہ کم سے کم گیندیں کھیلنی پڑیں۔
قیس احمد گیند کا دفاع کرنے کے بعد اچانک ہیمسٹرنگ پکڑ کر نیچے بیٹھ گئے جس کے بعد ان کا یہ انداز سوشل میڈیا پر توجہ کا مرکز بن گیا۔
ان کے اس عمل پر کمنٹیٹر بھی ہنس ہنس کر لوٹ پوٹ ہوگئے اور کہا کہ قیس کی اس حرکت نے افغان آل راؤنڈر گلبدین نائب کے 2024 ٹی ٹوئنٹی ورلڈکپ کے واقعے کی یاد دلا دی۔
واضح رہے کہ قیس احمد نے 80 گیندوں پر 49 رنز کی مزاحمت سے بھرپور اننگز کھیل کر یقینی شکست کو ڈرا میں تبدیل کردیا۔
