عوامی تحریک کےمارچ پر شیلنگ سے چوہدری شجاعت حسین کی طبیعت بگڑ گئی

چوہدری شجاعت حسین کی فوری طور پر گھر منتقل کیا گیا جہاں انہیں طبی امداد فراہم کی گئی

ویب ڈیسک August 31, 2014

سابق صدر آصف زرداری نے فون کرکے چوہدری شجاعت کی خیریت دریافت کی، فوٹو:فائل

پاکستان عوامی تحریک کے مارچ کے دوران آنسو گیس کی شیلنگ سے مارچ میں شریک مسلم لیگ (ق) کے صدر چوہدری شجاعت حسین کی طبیعت بگڑ گئی ۔

پاکستان عوامی تحریک کامارچ ڈاکٹر طاہرالقادری کی قیادت میں وزیراعظم ہاؤس کی جانب رواں دواں تھا جس میں مسلم لیگ (ق) کے صدر چوہدری شجاعت حسین بھی شریک تھے، مارچ کے شرکا کو روکنے کے لیے پولیس کی جانب سے آنسو گیس کی شدید شیلنگ کی گئی جس کے نتیجے میں چوہدری شجاعت حسین کی طبیعت بگڑ گئی جنہیں فوری طور پر گھر منتقل کردیا گیا جہاں انہیں طبی امداد فراہم کی جارہی ہے۔

دوسری جانب سابق صدر آصف زرداری نے چوہدری پرویز الٰہی کو فون کرکے چوہدری شجاعت حسین کی خیریت دریافت کی جبکہ متحدہ قومی موومنٹ کے قائد الطاف حسین نے بھی چوہدری پرویز الہیٰ کو فون کیا اور چوہدری شجاعت کی جلد صحت یابی کے لئے دعا کی۔