اسلام آباد:
ایشیائی ترقیاتی بینک نے پاکستان کو قدرتی آفات سے نمٹنے اور اثرات کم کرنے کے لیے 50 کروڑ ڈالر کی ہنگامی مالی معاونت کی منظوری دیدی۔
اس سہولت کے تحت سیلاب، زلزلے یا دیگر قدرتی آفات کی صورت میں پاکستان کو فوری بجٹ معاونت فراہم کی جائے گی تاکہ معیشت اور قومی خزانے پر پڑنے والے دباؤ کو کم کیا جا سکے۔
اے ڈی بی کے مطابق پاکستان میں سیلاب، زلزلوں اور دیگر قدرتی آفات کے باعث ہر سال اوسطاً 2 ارب ڈالر کا نقصان ہوتا ہے، جبکہ اے ڈی بی کے مطابق 2022 کے تباہ کن سیلابوں سے 14 ارب 90 کروڑ ڈالر کا براہ راست نقصان اور 15 ارب 20 کروڑ ڈالر کے معاشی خسارے کا سامنا کرنا پڑا تھا، جس کے نتیجے میں 91 لاکھ افراد غربت کی لپیٹ میں آگئے تھے۔
ماہرین کے مطابق قدرتی آفات سے غریب اور دیہی آبادی زیادہ متاثر ہوتی ہے، جبکہ خواتین اور بچیوں کو بھی غیر متناسب مشکلات کا سامنا کرنا پڑتا ہے۔
اے ڈی بی کے کلائمیٹ اینڈ ڈیزاسٹر ریزیلینس انہانسمنٹ پروگرام کے دوسرے مرحلے کے تحت پاکستان میں آفات سے نمٹنے کی تیاری، خطرات کے انتظام اور ترقیاتی منصوبہ بندی میں قدرتی آفات سے تحفظ کے اقدامات شامل کرنے کے لیے اصلاحات کی حمایت کی جائے گی۔
پروگرام کے ذریعے قدرتی آفات کے بعد مالی وسائل کی دستیابی بہتر بنانے اور پاکستان کے ڈیزاسٹر رسک فنانسنگ نظام کو بھی مضبوط کیا جائے گا۔
پاکستان میں اے ڈی بی کی کنٹری ڈائریکٹر ایما فین نے کہا کہ قدرتی آفات کے دوران سب سے زیادہ متاثر ہونے والی آبادی عموماً کمزور اور محروم طبقات پر مشتمل ہوتی ہے، اس لیے پیشگی تیاریوں میں سرمایہ کاری سے انسانی جانوں اور روزگار کا تحفظ، معاشی نقصانات میں کمی اور ترقیاتی کامیابیوں کو محفوظ بنانے میں مدد مل سکتی ہے۔
ان کا کہنا تھا کہ یہ پروگرام پاکستان کو اہم اصلاحات پر عمل درآمد اور مستقبل کو زیادہ محفوظ اور مستحکم بنانے میں معاون ثابت ہوگا۔ یہ پروگرام قدرتی آفات کے خطرات سے نمٹنے کے لیے پاکستان کی قومی ترجیحات اور ایشیا و بحرالکاہل میں موسمیاتی و قدرتی آفات کے خلاف لچکدار نظام کو فروغ دینے کے لیے اے ڈی بی کے عزم سے ہم آہنگ ہے۔
