بھارت نے انگلینڈ کو چوتھے میچ میں یکطرفہ مقابلے کے بعد 9 وکٹ سے شکست دے کر 5 میچز کی سیریز 0 -3 سے اپنے نام کرلی جب کہ ایک میچ بارش کی نذر ہوگیا اورآخری میچ جمعہ کولیڈز میں کھیلا جائے گا۔
بھارتی اوپننگ جوڑی نے اپنی شاندار بلے بازی سے انگلینڈ کے دیئے گئے ہدف 207 کو انتہائی آسان بنا دیا جبکہ انگلش بولرز ان کے سامنے بے بس دکھائی دیئے۔ آجینکے راہنے اور شیکر دھون نے پہلی وکٹ کی شراکت میں 183 رنز جوڑے، دونوں بیٹسمینوں نے انگلش بولروں کی خوب پٹائی کی اور وکٹ کے چاروں طرف خوبصورت اسڑوک کھیلے۔ راہنے نے 10چوکوں اور 4چھکوں کی مدد سے 106 رنز بنائے جبکہ شنکر دھون 97 رنز بناکر ناٹ آؤٹ رہے جس میں 11 چوکے اور 4 چھکے بھی شامل تھے۔
اس سے قبل بھارتی میڈیم فاسٹ بولرز نے انگلش بیٹسمینوں کو سنبھلنے کا موقع ہی نہیں دیا اور49.3 اوورز میں پوری ٹیم کو پویلین کی راہ دکھادی، انگلینڈ کی جانب سے معین علی 67 اور روٹ 44 رنز بنا کر نمایاں رہے،بھارت کی جانب سے محمد شامی نے 28 رنز دے کر 3 اور بھنشور کمار نے 2 وکٹیں حاصل کیں۔