تحریک انصاف اور عوامی تحریک شاہراہ دستور خالی کرنے پر تیار ہیں چوہدری نثار

دونوں جماعتوں کے مطالبات پر حکومت کی جانب سے جواب تیار بھی کرلیا گیا ہے، وفاقی وزیر داخلہ

ویب ڈیسک September 04, 2014

حکومت استعفوں کے علاوہ دیگر نکات پر آگے بڑھنے کے لیے پوری طرح تیار ہے، چوہدری نثار، فوٹو:فائل

وفاقی وزیر داخلہ چوہدری نثار علی خان کا کہنا ہے کہ تحریک انصاف کے 5 نکات پر آگے بڑھنے کے لئے تیار ہیں تاہم وزیراعظم کے استعفے کے معاملے پر حکومتی موقف برقرار ہے۔

ایکسپریس نیوز کے مطابق وزیر داخلہ چوہدری نثار نے بتایا کہ تحریک انصاف اور عوامی تحریک شاہراہ دستور خالی کرنے کے لئے تیار ہیں جس کے بعد دونوں جماعتیں واپس ڈی چوک منتقل ہوجائیں گی۔ انہوں نے کہا کہ تحریک انصاف کے مطالبات سیاسی، قانونی اور انتظامی نوعیت کے ہیں اور ان مطالبات کے قانونی مسودے پر وزیراعظم کو بریفنگ دی گئی ہے جب کہ دونوں جماعتوں کے مطالبات پر حکومت کی جانب سے جواب تیار بھی کرلیا گیا ہے جو آج فریقین تک پہنچا دیا جائے گا اور اگر بات آگے بڑھی تو اس معاہدے کو تحریری شکل دی جائے گی۔

چوہدری نثار کا کہنا تھا کہ حکومت استعفوں کے علاوہ دیگر نکات پر آگے بڑھنے کے لیے پوری طرح تیار ہے تاہم وزیراعظم کے استعفے کے معاملے پر حکومتی موقف برقرار ہے۔