ٹنڈو جام میں مسافروں سے بھری کوسٹر الٹ گئی ایک ہلاک 19 زخمی

4 زخمی تشویشناک حالت میں حیدرآباد روانہ، حادثہ میرپور خاص روڈ پر تیز رفتاری کے باعث پیش آیا فوٹو: فائل

---

ٹنڈوجام کے قریب میرپورخاص حیدرآباد روڈ پر تیز رفتار کوسٹر الٹ گئی۔

ایک شخص ہلاک، خواتین اور بچوں سمیت 19 مسافر زخمی، 4 کی حالت تشویشناک، ڈرائیور اور کنڈیکٹر فرار، زخمیوں کو سول اسپتال حیدرآباد روانہ کر دیا گیا۔ تفصیلات کے مطابق عثمان شاہ درگاہ کے سامنے میرپورخاص سے حیدرآباد جانے والی مسافروں سے بھری تیز رفتار کوسٹر الٹ گئی، حادثے کے نتیجے میں 20 افراد زخمی ہوگئے جنھیں حیدرآباد سول اسپتال پہنچایا گیا جہاں ایک شخص دم توڑ گیا، جس کی شناخت نہیں ہوسکی۔

15 افراد کو طبی امداد کے بعد روانہ کر دیا گیا، 4 زخمیوں شاہ زیب، شاکر مسیح، محمد حسن، غلام حیدر کی حالت تشویشناک بتائی جاتی ہے، کوسٹر ڈرائیور انور اور کنڈیکٹر فرار ہوگئے۔