جارج بیلی آسٹریلیا کی ٹی 20 کرکٹ ٹیم کی قیادت سے دستبردار ہوگئے

32 سالہ جارج بیلی 28 بین الاقوامی ٹی 20 مقابلوں اور 44 ایک روزہ میچوں میں آسٹریلیا کی نمائندگی کرچکے ہیں فوٹو: کرک انفو

---

LONDON: آسٹریلیا کے جارح مزاج بلے باز جارج بیلی ون ڈے اور ٹیسٹ کرکٹ پر توجہ دینے کے لئے ٹی 20 کرکٹ ٹیم کی قیادت سے دستبردار ہوگئے۔

کرکٹ کی خبروں سے متعلق ویب سائیٹ کے مطابق جارج بیلی ٹی 20 کرکٹ ٹیم کی قیادت سے دستبردار ہوگئے ہیں وہ پاکستان کے خلاف ٹی 20 سیریزمیں آسٹریلین ٹیم کی قیادت نہیں کریں گے۔ اس حوالے سے جارج بیلی کا کہنا ہے کہ کرکٹ کے مختصر ترین فارمیٹ میں آسٹریلین ٹیم کی قیادت ان کے لئے باعث فخر ہے اور ٹیم کی قیادت کے دوران وہ اس سے بھرپور لطف اندوز بھی ہوئے ہیں۔ آئندہ چند برسوں کے دوران وہ اپنے کیرئیر کو آگے بڑھانے کے لئے ایک روزہ اور ٹیسٹ کرکٹ پر بھرپور توجہ دینا چاہتے ہیں۔ اس لئے وہ اپنی قومی ٹی 20 ٹیم کی قیادت چھوڑ رہے ہیں۔

واضح رہے کہ 32 سالہ جارج بیلی 28 بین الاقوامی ٹی 20 مقابلوں اور 44 ایک روزہ میچوں میں آسٹریلیا کی نمائندگی کرچکے ہیں تاہم اب تک وہ صرف 5 ٹیسٹ میچز ہی کھیل پائے ہیں۔