کراچی میں ایک اور بینک ڈکیتی ڈاکو لاکھوں روپے لوٹ کر فرار

رواں برس کراچی کے مختلف علاقوں میں اب تک 17 بینک ڈکیتیاں ہوچکی ہیں۔ فوتو: ایکسپریس نیوز

---

شہر قائد میں حکومت اور قانون نافذ کرنے والے اداروں کے دعوؤں کے باوجود جرائم کی وارداتیں دھڑلے سے جاری ہیں جس کی ایک اور مثال شہید ملت روڈ سامنے آئی ہے جہاں نامعلوم ڈاکو بینک سے 40 لاکھ روپے لوٹ کر فرار ہوگئے۔

ایکسپریس نیوز کے مطابق کراچی کے علاقے شہید ملت روڈ پر 5 مسلح ملزمان نے پہلے بینک کے باہر موجود سیکیورٹی گارڈ کو تشدد کا نشانہ بناکر اس سے اسلحہ چھین لیا۔ جس کے بعد ڈاکو بینک میں داخل ہوئے اور انہوں نے بینک کے عملے کو یرغمال بنالیا۔ ڈاکو بینک کے کیشئیر کے پاس موجود 40لاکھ روپے سے زائد نقد رقم لوٹ کر باآسانی فرار ہوگئے۔ پولیس نے واقعے کے بعد شواہد اور سی سی ٹی وی فوٹیج کو قبضے میں لے کر تحقیقات شروع کردی ہے۔

واضح رہے کہ رواں برس کراچی کے مختلف علاقوں میں اب تک 17 بینک ڈکیتیاں ہوچکی ہیں۔