یوکرین میں عوام دشمن قانون سازی پر مظاہرین نے رکن پارلیمنٹ کو کوڑا دان میں ہی پھینک ڈالا

لوگ سیاستدانوں سے محبت بھی کرتے ہیں لیکن جب نفرت کرنے پر آجائیں تو پھر ہاتھ آجانے والے سیاستدان سے اپنی محرومی کا سارا غصہ بھی نکال لیتے ہیں اور ایسا ہی کچھ ہوا یوکرین میں جہاں عوام نے کرپٹ سیاستدانوں سے جان چھڑانے کا انوکھا طریقہ اپناتے ہوئے عوام دشمن قانون سازی کرنے پر ایک سیاستدان کو ہی کوڑے دان میں پھینک دیا۔

ہوا کچھ یوں کہ یوکرین کے دارالحکومت کیف میں میں مظاہرین حکومتی پالیسیوں کے خلاف احتجاج کر رہے تھے اور ان کے تیور بھی انتہائی خطرناک تھے کہ اچانک انہیں رکن پارلیمنٹ ویتلے زوراسکی نظر آ گئے جوپارلیمنٹ میں قانون سازی کے دوران ایسے بل کے حق میں ووٹ دیتے تھے جس سے عوام کی مشکلات میں اضافہ ہو، بس پھر کیا تھا مظاہرین نے رکن پارلیمنٹ کو آڑے ہاتھوں لیا اور ساراغصہ ان پر ہی نکال ڈالا، زوراسکی چیختے رہے کہ ان کی بات تو سن لی جائے لیکن جب جذبات اتنے گرم ہوں تو پھر کون کس کی سنتا ہے بس پھر کیا تھا مظاہرین نے انہیں اٹھا کر کوڑا دان میں ہی ڈال دیا۔


زوراسکی نے باہر نکلنے کو بہت کوشش کی مگر ہربارمظاہرین انہیں دوبارہ کچرہ دان میں دھکیل دیتے اورجب پولیس وہاں پہنچی تو موصوف کی جان میں جان آئی،پولیس نے مظاہرین کو بڑی مشکل سے ہٹاکر رکن پارلیمنٹ کی جان بچائی۔